స్వప్రయోజనాలకే కృష్ణా జలాల తాకట్టు

తెదేపా నేత దేవినేని ఉమా మండిపాటు

ఈనాడు, అమరావతి: తనపై ఉన్న కేసుల నుంచి తప్పించుకోవడానికి, బాబాయ్‌ హత్య కేసు నుంచి అవినాష్‌రెడ్డిని కాపాడటానికి.. కృష్ణా జలాల్ని పక్క రాష్ట్రానికి సీఎం జగన్‌ ధారాదత్తం చేశారని మాజీ మంత్రి, తెదేపా నేత దేవినేని ఉమామహేశ్వరరావు మండిపడ్డారు. మంగళగిరిలో శుక్రవారం ఆయన విలేకర్లతో మాట్లాడారు. సాగునీటి నిర్వహణలో తన అసమర్థతను కప్పిపుచ్చుకోవడానికే సీఎం కొత్త నాటకాలకు తెర తీశారని దుయ్యబట్టారు. ‘కృష్ణా జలాలతో ఏ జిల్లాలో ఎంత ఆయకట్టు సాగులోకి వస్తుందో కూడా జగన్‌కు తెలియదు. గతంలో చంద్రబాబు.. కేఆర్‌ఎంబీతో వివాదాలు లేకుండా రాష్ట్రానికి రావాల్సిన వాటా సాధించారు. మా పాలనలో ఏ సంవత్సరం.. ఏ ప్రాజెక్టు నుంచి ఎంత నీరు ఇచ్చామనే వివరాల్ని ఆధారాలతో ప్రజల ముందు ఉంచేందుకు సిద్ధం?’ అని తెలిపారు.