రైతుల నుంచి బేషరతుగా ధాన్యం సేకరించాలి

తెదేపా అధినేత చంద్రబాబు డిమాండ్‌

ఈనాడు డిజిటల్‌, అమరావతి: మిగ్‌జాం తుపాను నేపథ్యంలో అన్నదాతల నుంచి బేషరతుగా ధాన్యం సేకరించాలని తెదేపా అధినేత చంద్రబాబు డిమాండ్‌ చేశారు. భారీ వర్షాల కారణంగా పంటలు నష్టపోయే రైతుల్ని ప్రభుత్వం ఆదుకోవాలని, ప్రభావిత ప్రాంతాల్లో వెంటనే సహాయ చర్యలు చేపట్టాలని కోరారు. గతంలోనూ అకాల వర్షాలతో రైతులు తీవ్రంగా నష్టపోయినా, ప్రభుత్వం తగిన రీతిలో స్పందించలేదని సోమవారం ఓ ప్రకటనలో పేర్కొన్నారు. తుపాను బాధితులకు అండగా ఉండాలని తెదేపా కార్యకర్తలు, నేతలకు పిలుపునిచ్చారు. ‘పలు జిల్లాలపై తుపాను ప్రభావం తీవ్రంగా ఉండనుంది. బాధితులకు చేతనైన సాయం చేయాలి. ఆహారం పంపిణీ, షెల్టర్ల ఏర్పాటుకు ప్రభుత్వం చర్యలు తీసుకోవాలి. పక్కా ప్రణాళికతో నష్టం వాటిల్లకుండా చూడాలి’ అని సూచించారు.

తుపాను కారణంగా చంద్రబాబు శ్రీశైలం పర్యటన రద్దయింది. షెడ్యూల్‌లో భాగంగా మంగళవారం ఆయన మల్లికార్జున స్వామిని దర్శించుకోవాల్సి ఉంది.