సీఎం బయటికి రారేం?

వైకాపా ఎంపీ రఘురామకృష్ణరాజు

ఈనాడు, దిల్లీ: మిగ్‌జాం తుపాను ప్రభావంతో రాష్ట్రం అతలాకుతలం అవుతుంటే సీఎం జగన్‌ ఒక చిన్న సందేశమిచ్చి ఇంట్లో కూర్చోవడం చూస్తే రోమ్‌ నగరం తగలబడుతుంటే నీరో చక్రవర్తి ఫిడేల్‌ వాయించుకున్నట్లుగా ఉందని వైకాపా ఎంపీ రఘురామకృష్ణరాజు విమర్శించారు. దిల్లీలో ఆయన బుధవారం విలేకర్లతో మాట్లాడారు. జగన్‌ ఇప్పటికైనా తుపాను ప్రభావిత ప్రాంతాల్లో పర్యటించి ప్రజల ఇబ్బందులు తెలుసుకొని ఆదుకునే ప్రయత్నం చేయాలని సూచించారు. సీఎం స్థాయి వ్యక్తి ఉపద్రవాలు వచ్చిన ప్రాంతంలోనే ఉంటే ఎంత సాధికారికంగా పనులు జరుగుతాయో విశాఖపట్నంలో తిత్లీ తుపాను వచ్చినప్పుడు చంద్రబాబు వ్యవహరించిన తీరుతో అంతా చూశారన్నారు. తుపాను ప్రభావిత ప్రాంతాల్లో ముఖ్యమంత్రి, ఆయన మంత్రివర్గ సహచరులు పత్తా లేరన్నారు. ఎమ్మెల్యేలూ వారి బాటలోనే నడుస్తున్నారని, ప్రస్తుతం రాష్ట్రంలో తుపాను బాధితులను ఎవరూ పట్టించుకోని దుస్థితి నెలకొందని ఎంపీ ఆవేదన వ్యక్తం చేశారు.