ఏళ్లుగా ఇబ్బందులు పడుతుంటే ఇప్పుడు వచ్చారా..?

ఎమ్మెల్యే సుచరితను నిలదీసిన మహిళలు

కాకుమాను, న్యూస్‌టుడే: గుంటూరు జిల్లా కాకుమానులో తుపాను కారణంగా దెబ్బతిన్న పంటలను పరిశీలించేందుకు వెళ్లిన ప్రత్తిపాడు ఎమ్మెల్యే మేకతోటి సుచరితకు నిరసన సెగ తగిలింది. స్థానిక మహిళలు.. ఎస్సీ కాలనీలో ఆమె కారును అడ్డగించి సమస్యలపై నిలదీశారు. తాము ఓట్లు వేసి గెలిపించాక.. ప్రజాప్రతినిధులెవరూ కనీసం ఇటువైపు కన్నెత్తి చూడటం లేదని, ఇళ్లలోకి వాననీరు చేరినా పట్టించుకోవడం లేదని ఆగ్రహం వ్యక్తం చేశారు. పునరావాస కేంద్రాలు ఎక్కడ ఏర్పాటు చేశారనే సమాచారమూ చెప్పలేదన్నారు. ఏళ్లుగా తాము ఇబ్బందులు పడుతుంటే ఎన్నికలు సమీపిస్తుండటంతో ఇప్పుడు వచ్చారా అంటూ ప్రశ్నించారు. కాలనీలో రహదారులు నిర్మించలేదని, మురుగు కాలువలో పూడిక కూడా తీయడం లేదన్నారు. కావాలనే.. అర్హులైన వారికి ఇళ్ల స్థలాలు ఇవ్వకుండా చేశారని ఆరోపించారు. ఈ క్రమంలో కొంతమంది నాయకులు వారిని ఆపే ప్రయత్నం చేయగా సమస్యలను కూడా చెప్పుకోనివ్వరా అని అసహనం వ్యక్తం చేశారు. అనారోగ్యం కారణంగా ఇబ్బందులు పడ్డ తమకు న్యాయం చేయాలని ఓ మహిళ ఎమ్మెల్యేను కోరగా, సీఎం రిలీఫ్‌ ఫండ్‌ నుంచి ఆర్థికసాయం మంజూరు చేయిస్తామని హామీ ఇచ్చారు. ఆయా సమస్యల పరిష్కారానికి కూడా చర్యలు తీసుకుంటామని సమాధానమిస్తూ అక్కడి నుంచి వెళ్లిపోయారు.