ఎంపీగా పోటీకి అవకాశం ఇవ్వాలని సీఎంను కోరా

ఉప ముఖ్యమంత్రి రాజన్నదొర

సాలూరు, న్యూస్‌టుడే: ‘ఆరోగ్య సమస్యలు, కుటుంబ బాధ్యతల నేపథ్యంలో ఈసారి ఎంపీ అయితే బాగుంటుందని.. అందుకే అరకు పార్లమెంట్‌ స్థానం నుంచి పోటీచేసే అవకాశం ఇవ్వాలని ఇటీవల సీఎం జగన్‌ను కలిసి కోరా. ఆ కోరిక నెరవేరితే సంతోషిస్తా’ అని ఉప ముఖ్యమంత్రి పి.రాజన్నదొర అన్నారు. పార్వతీపురం మన్యం జిల్లా సాలూరు పట్టణంలో గురువారం నిర్వహించిన వాలంటీర్లకు వందనం కార్యక్రమంలో ఆయన ప్రసంగించారు. ‘సాలూరు నుంచి నాలుగుసార్లు ఎమ్మెల్యేగా గెలిపించారు. ఈసారి ఎంపీ కావాలని కోరుకున్నా. సీఎం ఆ అవకాశం ఇస్తే ఆరోగ్యాన్ని కాపాడుకుని, భార్యాపిల్లలతో ఆనందంగా గడిపే అదృష్టం వచ్చిందని అనుకుంటా. అలా అని బాధ్యతలు మరచిపోను. మీరు (వాలంటీర్లు) జగన్‌నే కోరుకోవాలి. వాలంటీరు, సచివాలయ వ్యవస్థ ఉండాలంటే వైకాపా విజయం సాధించాలి’ అని పేర్కొన్నారు.