ఓడిపోయేందుకే నాపై గంటా పోటీ చేస్తున్నారు

మంత్రి బొత్స వ్యాఖ్య

ఈనాడు డిజిటల్‌, అమరావతి: ఎన్ని నియోజకవర్గాలు మారినా, ఓటమి లేని గంటా శ్రీనివాసరావు ఈసారి ఓడిపోయి.. ఆ రికార్డును మార్చుకునేందుకే తనపై పోటీ చేస్తున్నారని విద్యా శాఖ మంత్రి బొత్స సత్యనారాయణ విమర్శించారు. ఎన్నికల్లో ఎవరో ఒకరు పోటీ చేస్తారని, అలాగే గంటా చేస్తున్నారని శుక్రవారం సచివాలయంలో నిర్వహించిన విలేకర్ల సమావేశంలో వ్యాఖ్యానించారు. పండగ పూట గంగిరెద్దులు వచ్చినట్లు ఎన్నికల సమయంలో ప్రతిపక్ష పార్టీలు ప్రచారానికి వస్తున్నాయన్నారు. ప్రతిపక్షంలో ఉన్నందుకు ఏదో ఒకటి చేయాలన్నట్లు సభలు, సమావేశాలు పెడుతున్నారని పేర్కొన్నారు. పీసీసీ అధ్యక్షురాలు వైఎస్‌ షర్మిలను అరెస్టు చేసిన విషయం తనకు తెలియదని, తమ ప్రభుత్వం ప్రజాస్వామ్యాన్ని అతిక్రమించబోదని చెప్పారు.