తాగునీటి సమస్యపై వైకాపా కార్పొరేటర్ల నిరసన

అనంత నగరపాలక, న్యూస్‌టుడే: తాగునీటి కోసం అనంతపురంలో వైకాపా కార్పొరేటర్లు నిరసనకు దిగారు. రెండు నెలలుగా నగరంలో నీటి సరఫరా చేయకపోవడంతో ప్రజల నుంచి ఒత్తిడి పెరిగింది. దీంతో వైకాపా కార్పొరేటర్లు స్థానికులతో కలిసి మంగళవారం నగరపాలక కార్యాలయం వద్ద ఆందోళనకు దిగారు.

ప్రజలు ఖాళీ బిందెలు, కుండలతో కార్యాలయం ఎదుట బైఠాయించారు. లోనికెళ్లేందుకు యత్నించగా పోలీసులు గేట్లు వేసి అడ్డుకున్నారు. ఆగ్రహించిన 12వ డివిజన్‌ కార్పొరేటర్‌ షేక్‌బాబా ఫకృద్ధీన్‌, యువకులు గేటు ఎక్కి కమిషనర్‌ కార్యాలయ ప్రాంగణంలోకి దూకారు. పలువురు మహిళలూ గేట్లు ఎక్కి నిరసన వ్యక్తం చేశారు. నిరసనలో 23వ డివిజన్‌ వైకాపా కార్పొరేటర్‌ హరిత, ఆమె భర్త జయరాం నాయుడు, పెద్దఎత్తున స్థానికులు పాల్గొన్నారు.