కేంద్ర పథకాల లబ్ధిదారుల ఇళ్లకు భాజపా కార్యకర్తలు

సెల్‌ఫోన్‌ నంబర్లతో సహా జిల్లాలకు జాబితాలు
రాష్ట్ర నేతలకు శివప్రకాష్‌ సూచనలు

ఈనాడు, అమరావతి: కేంద్ర ప్రభుత్వ పథకాల ద్వారా లబ్ధిపొందిన వారిని భాజపా రాష్ట్ర కార్యకర్తలు కలుసుకోనున్నారు. దేశవ్యాప్తంగా ఈ పథకాల ద్వారా లబ్ధిపొందిన వారి జాబితాలను జాతీయ నాయకత్వం సిద్ధం చేసింది. ఇందులో 40 లక్షల మంది ఏపీ నుంచి ఉన్నారని గుర్తించారు. ఈ జాబితా ఆధారంగా లబ్ధిదారుల ఇళ్లకు వెళ్లి తమ పథకాల గురించి వివరించేందుకు ఎలాంటి చర్యలు తీసుకోవాలన్న దానిపై భాజపా రాష్ట్ర శాఖ నేతలు కొందరు హైదరాబాద్‌లో బుధవారం రాత్రి సమావేశమయ్యారు. జాతీయ నాయకుడు శివప్రకాష్‌ అధ్యక్షతన జరిగిన ఈ సమావేశంలో పార్టీ రాష్ట్ర శాఖ అధ్యక్షురాలు పురందేశ్వరి, ఇతర సీనియర్‌ నేతలు పాల్గొన్నారు. ఈ సమావేశంలో ప్రధానంగా కేంద్ర ప్రభుత్వ పథకాల ద్వారా లబ్ధి పొందిన 40 లక్షల మందితో కూడిన జాబితాను జిల్లాల వారీగా విభజించి, జిల్లా నాయకులకు పంపాలని నిర్ణయించారు. లబ్ధిదారుల పేర్లతో పాటు వారి సెల్‌ఫోన్‌ నంబర్లు కూడా ఉన్నాయి. మార్చి 3 నుంచి 5వ తేదీ మధ్య జిల్లా నాయకత్వం ఎంపిక చేసిన వారిలో ఒక్కొక్కరు కనీసం ఐదుగురు లబ్ధిదారుల ఇళ్లకు వెళ్లి.. కేంద్ర పథకాల ద్వారా లబ్ధిపొందిన విషయాన్ని నేరుగా వారికి వివరించి, పీఎం మోదీ పేరుతో ఉన్న ఓ కరపత్రాన్ని అందచేయనున్నారు. కేంద్ర ప్రభుత్వ పథకాల గురించి రాష్ట్ర ప్రభుత్వం స్టిక్కర్లు వేసుకుని తనవిగా ప్రచారం చేసుకుంటోందని జాతీయ నాయకత్వానికి భాజపా నేతలు గతంలో ఫిర్యాదు చేశారు. ఈ పరిణామాల నేపథ్యంలో లబ్ధిదారులను నేరుగా కలుసుకొని వివరించేలా భాజపా సన్నాహాలు ప్రారంభించింది. పొత్తుల గురించి జాతీయ నాయకత్వం నిర్ణయం తీసుకునేందుకు నాలుగైదు రోజుల సమయం పడుతుందని పార్టీ వర్గాలు తెలిపాయి.