‘మాకు ఓటేయకపోతే మీ ఉసురు మాకు తగులుతుందట..!’

జగన్‌ చెప్పారన్న ఎమ్మెల్యే శ్రీరంగనాథరాజు

మార్టేరు, న్యూస్‌టుడే: ‘మీరు మా పార్టీకి ఓటేయకపోతే.. మీ ఉసురు మాకు తగులుతుందని సీఎం జగన్‌మోహన్‌రెడ్డి చెప్పారు’ అని ఆచంట ఎమ్మెల్యే చెరుకువాడ శ్రీరంగనాథరాజు మహిళలను ఉద్దేశించి అన్న మాటలు చర్చనీయాంశంగా మారాయి. పశ్చిమగోదావరి జిల్లా పెనుమంట్ర మండలం నెలమూరు గ్రామంలో ఓ కార్యక్రమంలో ఎమ్మెల్యే మహిళలను ఉద్దేశించి మాట్లాడారు. ‘పొరపాటున చంద్రబాబు అధికారంలోకి వస్తే పథకాలన్నీ ఆపేస్తారు. అక్కచెల్లెళ్లు అంతా లబోదిబోమంటారు. అప్పుడు మీ కన్నీళ్లు చూడలేమని సీఎం అన్నారు. వైకాపా ప్రభుత్వం రాకపోతే రాష్ట్రంలోని మహిళలందరూ ఏడుస్తారు. ఆ ఉసురు మాకే తగులుతుందని జగన్‌ చెప్పారు. అందుకే కష్టపడి పార్టీ అధికారంలోకి వచ్చేలా కృషి చేయాలని మాకు సూచించారు. మంచి మెజార్టీతో పార్టీని గెలిపించాలని కోరారు. 155 సార్లు బటన్‌ నొక్కాం.. మీరు 2 సార్లు నొక్కితే సరిపోతుందని సీఎం జగన్‌ చెప్పారు’ అని రంగనాథరాజు తెలిపారు. నియోజకవర్గంలో డ్వాక్రా గ్రూపుల్లో ఉన్న మహిళలందరికీ చీరలిచ్చామని, మిగిలిన మహిళలకూ ఈ రెండు రోజుల్లోనే అందజేస్తామన్నారు.