వరుణ్‌గాంధీని కాంగ్రెస్‌లోకి ఆహ్వానించిన అధీర్‌ రంజన్‌

బహరాంపుర్‌ (పశ్చిమబెంగాల్‌): గాంధీ కుటుంబంతో ఉన్న అనుబంధం కారణంగానే ఎంపీ వరుణ్‌ గాంధీకి భాజపా టికెట్‌ నిరాకరించిందని లోక్‌సభలో కాంగ్రెస్‌ పక్షనేత అధీర్‌ రంజన్‌ చౌధరి ఆరోపించారు. ‘వరుణ్‌ విద్యావంతుడు, ఎలాంటి అవినీతి ఆరోపణలు లేని ఒక దబాంగ్‌ నేత (బలమైన నాయకుడు). కాంగ్రెస్‌ అగ్రనేత రాహుల్‌గాంధీకి ఆయన సోదరుడు కావడంతో సహజంగానే గాంధీ కుటుంబంతో అనుబంధం ఉంటుంది. అందుకే వరుణ్‌కు లోక్‌సభ ఎన్నికల్లో భాజపా టికెట్‌ నిరాకరించింది. ఆయన కాంగ్రెస్‌ పార్టీలోకి రావాలని నేను అనుకుంటున్నాను. ఆయన కాంగ్రెస్‌లో చేరితే మేమెంతో సంతోషిస్తాం’ అని మంగళవారం అధీర్‌ పేర్కొన్నారు. చేరికపై వరుణ్‌తో పార్టీ నేతలు చర్చలు జరుపుతున్నట్లు తెలుస్తోంది. ఆయన పార్టీ మారే అవకాశాలున్నట్లు ప్రచారం జోరందుకుంది. పీలీభీత్‌ నుంచి రెండుసార్లు ఎంపీగా గెలిచిన వరుణ్‌ గాంధీ కేంద్ర, ఉత్తర్‌ప్రదేశ్‌ ప్రభుత్వ నిర్ణయాలపై కొంతకాలంగా విమర్శలు చేస్తున్నారు. కాంగ్రెస్‌ అగ్రనేత రాహుల్‌ గాంధీని గతేడాది ఆయన కేదార్‌నాథ్‌లో కలుసుకోవడం ఆసక్తికర చర్చకు దారితీసింది. భాజపాకు దూరంగా ఉంటున్న ఆయన.. పార్టీ మారే అవకాశం ఉందంటూ అప్పట్లోనే వార్తలు వచ్చాయి.