అవినీతి పార్టీలతో పొత్తు అక్కర్లేదు: ఏలేటి మహేశ్వర్‌రెడ్డి

నిర్మల్‌ పట్టణం, న్యూస్‌టుడే: కాంగ్రెస్‌, భారాస రెండూ పొత్తు పార్టీలని, గతంలో మంత్రి పదవులు పంచుకున్నాయని నిర్మల్‌ ఎమ్మెల్యే, భాజపా శానససభాపక్ష నేత ఏలేటి మహేశ్వర్‌రెడ్డి పేర్కొన్నారు. ఆదిలాబాద్‌ ఎంపీ అభ్యర్థి గోడం నగేశ్‌తో కలిసి నిర్మల్‌లో బుధవారం రాత్రి ఆయన విలేకరుల సమావేశంలో మాట్లాడారు. అవినీతి పార్టీలతో పొత్తు పెట్టుకోవాల్సిన అవసరం భాజపాకు లేదని చెప్పారు. ప్రస్తుత సీఎం వసూళ్లే లక్ష్యంగా కుర్చీలో కూర్చున్నట్లుందని మండిపడ్డారు. మూడు నెలల కాలంలో దాదాపు రూ.3 వేల కోట్ల అవినీతి జరిగిందని, దిల్లీ పెద్దలకు రూ.1,500 కోట్లు పంపించారని ఆరోపించారు. ఎక్కడెక్కడ ఎంత వసూలు చేస్తున్నారో జాబితా తమవద్ద ఉందన్నారు. భారాస ఎమ్మెల్సీ కవిత మద్యం వ్యవహారంలో ఆర్థిక నేరానికి పాల్పడినట్లు ఆధారాలు ఉండటంతోనే ఈడీ అరెస్టు చేసిందని, ఈ విషయంలో భాజపాకు ఏం సంబంధం ఉంటుందని ప్రశ్నించారు.