భారాస ఆరిపోయే దీపం: మధుయాస్కీగౌడ్‌

హైదరాబాద్‌, న్యూస్‌టుడే: భారాస పార్టీ ఆరిపోయే దీపం అని పీసీసీ ప్రచార కమిటీ ఛైర్మన్‌ మధుయాస్కీగౌడ్‌ వ్యాఖ్యానించారు. ఆయన బుధవారం గాంధీభవన్‌లో విలేకరులతో మాట్లాడారు. ఫోన్‌ ట్యాపింగ్‌ కేసులో ఎ1, ఎ2 గా కేసీఆర్‌, కేటీఆర్‌ ఉంటారన్నారు. అధికారుల విచారణ తర్వాత వారిని విచారించే అవకాశం ఉందన్నారు. కాంగ్రెస్‌ వంద రోజుల పాలన చూసి కేటీఆర్‌ భయపడుతున్నారని, అన్ని శాఖలలో భారాస అనుకూల అధికారులు ఇంకా పోస్టింగుల్లో కొనసాగుతున్నారని, పార్లమెంట్‌ ఎన్నికల తర్వాత అవినీతి అధికారులపై విచారణ జరిగే అవకాశముందని పేర్కొన్నారు. దిల్లీలో ఎన్నికల ముందు కేజ్రీవాల్‌ను అరెస్టు చేయడాన్ని మాత్రమే ఏఐసీసీ తప్పు పట్టిందని, విచారణను వ్యతిరేకించలేదని తెలిపారు. భువనగిరి ఎంపీగా పోటీ చేస్తే గెలిపించే బాధ్యత తాను తీసుకుంటానని రాజగోపాల్‌రెడ్డి అన్నారు కానీ.. నాకు ఇష్టం లేదని చెప్పా అని మధుయాస్కీ తెలిపారు.