అరుణాచల్‌ సీఎం ఖండూ ఎన్నిక ఏకగ్రీవం!

మరో నలుగురు భాజపా నేతలూ..

ఈటానగర్‌: అరుణాచల్‌ ప్రదేశ్‌ అసెంబ్లీ ఎన్నికల్లో 5 సీట్లు ఏకగ్రీవం కానున్నాయి. ఇందులో ముఖ్యమంత్రి పెమా ఖండూ, నలుగురు భాజపా నేతలున్నారు. బుధవారంతో ఇక్కడ నామినేషన్ల ఘట్టం ముగిసింది. ఈ ఐదు చోట్లా భాజపా నేతలు మినహా ఎవరూ నామినేషన్లు వేయలేదు. దీంతో వారు ఏకగ్రీవంగా ఎన్నికైనట్లే. నామినేషన్ల ఉపసంహరణ అనంతరం వారి ఎన్నికను అధికారికంగా ప్రకటించే అవకాశముంది. తవాంగ్‌ జిల్లాలోని ముక్తో అసెంబ్లీ నియోజకవర్గం నుంచి ఖండూ ఎన్నిక కానున్నారు. ఆయన 2010 నుంచి ఇక్కడ ఎన్నికవుతూ వస్తున్నారు. ఏకగ్రీవంగా ఎన్నికల కానున్న భాజపా నేతల్లో సగాలీ నుంచి రాతు తెకీ, రోయింగ్‌ నుంచి ముచ్చు మితి, తాలి నుంచి జిక్కే టాకో, తలీహా నుంచి న్యాటో దుకం ఉన్నారు.