పాపాల పెద్దిరెడ్డికి దళితులంటే ఎందుకంత చులకన?

సత్యవేడు ఎమ్మెల్యే ఆదిమూలం

నాగలాపురం, న్యూస్‌టుడే: రాయలసీమలో అన్యాయాలు చేస్తూ రూ.కోట్లకు పడగలెత్తిన పాపాల పెద్దిరెడ్డికి దళితులంటే ఎందుకంత చులకన భావమని ఎమ్మెల్యే కోనేటి ఆదిమూలం ప్రశ్నించారు. నాగలాపురంలోని తెదేపా మండలాధ్యక్షుడు శ్రీనివాసులుయాదవ్‌ నివాసంలో పార్టీ నేతలు, కార్యకర్తలతో ఆయన గురువారం సమావేశమయ్యారు. గత ఎన్నికల్లో వైకాపా అధిష్ఠానం సత్యవేడు నియోజకవర్గానికి సరఫరా చేసిన రూ.15 కోట్ల నగదును పెద్దిరెడ్డి దళితులను నమ్మకుండా ఆయన అనుచరుడైన బీరేంద్రరాజుతో ఖర్చుపెట్టించి సింహభాగాన్ని లూటీ చేశారన్నారు. సత్యవేడులో ఇసుక, గ్రావెల్‌, ఎర్రచందనం వంటి వనరులను విజయసాయిరెడ్డి, పెద్దిరెడ్డి, బీరేంద్రరాజు, పొంగులేటి వంటివారు స్వాహా చేశారని ఆరోపించారు. ముఖ్యమంత్రి మనిషి అంటూ గురుమూర్తికి టికెట్‌ ఇవ్వడం, అధిష్ఠానం వద్ద ఆవేదన వ్యక్తం చేసే తనలాంటి వారికి నిరాకరించడం వైకాపా నేతల నైజమని విమర్శించారు. జగన్‌ పేరుకే వైకాపా అధినేత అని, అంతా పెద్దిరెడ్డి కనుసన్నల్లో జరుగుతుండటాన్ని చూస్తుంటే ఎవరు అధినేతనే సందేహం కలుగుతోందన్నారు.