మచిలీపట్నం లోక్‌సభ జనసేన అభ్యర్థిగా బాలశౌరి

ఈనాడు డిజిటల్‌, అమరావతి: మచిలీపట్నం లోక్‌సభ స్థానం నుంచి జనసేన పార్టీ అభ్యర్థిగా వల్లభనేని బాలశౌరి పేరును ఆ పార్టీ అధ్యక్షుడు పవన్‌కల్యాణ్‌ శనివారం ప్రకటించారు. అదే స్థానం నుంచి వైకాపా సిటింగ్‌ ఎంపీగా ఉన్న బాలశౌరి సీఎం జగన్‌తో విభేదించి జనసేనలో చేరారు. గుంటూరుకు చెందిన ఈయన ఎంఏ పూర్తిచేసి, మైనింగ్‌ వ్యాపారం మొదలుపెట్టారు. వ్యాపారవేత్తగా కొనసాగుతూ 2004లో కాంగ్రెస్‌ నుంచి పోటీచేసి తెనాలి ఎంపీగా గెలిచారు. 2009లో నరసరావుపేట, 2014లో గుంటూరు స్థానాల నుంచి పోటీ చేసి ఓటమి పాలయ్యారు. గత ఎన్నికల్లో వైకాపా తరఫున మచిలీపట్నం నుంచి విజయం సాధించారు. ఇప్పుడు మరోసారి ఎన్నికల బరిలో నిలిచారు.