విశాఖ జిల్లాలో వైకాపాకు షాక్‌

ఆ పార్టీ భీమిలి జడ్పీటీసీ సభ్యుడు సహా పలువురి మూకుమ్మడి రాజీనామా

విశాఖపట్నం(తగరపువలస), న్యూస్‌టుడే: పశుగణాభివృద్ధి సంఘం విశాఖ జిల్లా ఛైర్మన్‌, భీమిలి మండల వైకాపా జడ్పీటీసీ సభ్యుడు గాడు వెంకటప్పడు తన అనుచరులతో కలిసి ఆ పార్టీకి రాజీనామా చేశారు. ఈ మేరకు ఆదివారం విశాఖపట్నంలో విలేకరుల సమావేశం నిర్వహించి వివరాలు వెల్లడించారు. వైకాపా హయాంలో కక్ష సాధింపులు తప్ప.. అభివృద్ధి దిశగా పాలన లేదని వ్యాఖ్యానించారు. అలాంటి పార్టీలో కొనసాగడం ధర్మం కాదనిపించి ఈ నిర్ణయం తీసుకున్నట్లు పేర్కొన్నారు. తనతోపాటు సింగనబంద, మజ్జివలస, లక్ష్మీపురం, దాకమర్రి, తాళ్లవలస, నారాయణరాజుపేట, మజ్జిపేట, బోడమెట్టపాలెం పంచాయతీలకు చెందిన ఓ సర్పంచి, ఎంపీటీసీ సభ్యుడు, అయిదుగురు మాజీ సర్పంచులు, నలుగురు మాజీ ఎంపీటీసీ సభ్యులు, ముగ్గురు ఉప సర్పంచులు, 30 మంది వార్డుసభ్యులు, ఓ పీఏసీఎస్‌ డైరెక్టరు, మాజీ ఉపాధ్యక్షుడు, నలుగురు సచివాలయ కన్వీనర్లు సహా 100 మంది నేతలు వైకాపాను వీడుతున్నట్లు వివరించారు.