తొలినాళ్లలో ఎన్నెన్నో వింతలు.. లోక్‌సభ ఎన్నికల్లో చిత్ర విచిత్రాలు

భారత్‌లో ప్రజాస్వామ్య పండగగా అభివర్ణించే సార్వత్రిక ఎన్నికలను సమర్థంగా నిర్వహించేందుకు ఎన్నికల సంఘం సిద్ధమైంది. దాదాపు 97 కోట్ల మంది ఓటర్లున్న దేశంలో ప్రతి ఒక్కరి భాగస్వామ్యం ఉండేలా చూసేందుకు భారీ కసరత్తు చేస్తోంది.

Updated : 08 Apr 2024 07:15 IST

దిల్లీ: భారత్‌లో ప్రజాస్వామ్య పండగగా అభివర్ణించే సార్వత్రిక ఎన్నికలను సమర్థంగా నిర్వహించేందుకు ఎన్నికల సంఘం సిద్ధమైంది. దాదాపు 97 కోట్ల మంది ఓటర్లున్న దేశంలో ప్రతి ఒక్కరి భాగస్వామ్యం ఉండేలా చూసేందుకు భారీ కసరత్తు చేస్తోంది. దేశంలో సార్వత్రిక ఎన్నికల తొలినాళ్లలో ఎన్నో సవాళ్లతోపాటు ఆసక్తికర పరిణామాలు చోటుచేసుకున్నాయి. ముఖ్యంగా  1957 (రెండో సాధారణ) ఎన్నికల సమయంలో దేశవ్యాప్తంగా పలు పోలింగ్‌ కేంద్రాల్లో వింత, హాస్యాస్పద సంఘటనలు వెలుగులోకి వచ్చాయి. వీటిని ఎన్నికల సంఘం పలు సందర్భాల్లో వెల్లడించింది.

  • అప్పటి మద్రాస్‌ రాష్ట్రానికి చెందిన ఒక ఓటరు ఎన్నికల్లో ఎవరికీ ఓటు వేయనని భీష్మించారు. ప్రచారంతో రాజకీయ పార్టీలు తనను ఎంతగానో వేధించాయని, అందుకే అప్పటి ప్రధాన ఎన్నికల కమిషనర్‌గా ఉన్న సుకుమార్‌ సేన్‌కే తాను ఓటు వేస్తానని చెప్పడం విశేషం.
  • ఓ ఓటరు.. బ్యాలెట్‌ బాక్సును ‘ఆరాధ్య వస్తువుగా’ భావించారు. ఓటు వేసే ముందు దానికి పూజలు చేశారు. మరికొన్ని చోట్ల ఓటర్లు వాటిని పూజించే వస్తువుగా భావించి, పూలను వదిలివెళ్లారు.
  • అప్పటి మద్రాస్‌లో (చెన్నై) పోలింగ్‌ కేంద్రంలోకి వెళ్లిన ఓ మహిళా ఓటరు గట్టిగా అరవడం మొదలుపెట్టారు. ‘ఈ రోజుల్లో కింగ్‌ మేకర్‌, మినిస్టర్‌ మేకర్‌ నీవే. పాత రోజుల్లో మాదిరిగా తక్కువ ధరకు బియ్యం అందించండి’ అని బ్యాలెట్‌ బాక్సును ఉద్దేశించి ఆమె పేర్కొన్నారు.
  • కొన్ని కౌంటింగ్‌ కేంద్రాల్లో బ్యాలెట్‌ బాక్సులు తెరిచినప్పుడు విభిన్న వస్తువులు కనిపించాయట. తమ అభ్యర్థి విజయం సాధించాలని కొందరు, దుర్భాషలాడుతూ మరికొందరు చీటీలను బ్యాలెట్‌ బాక్సులో వేశారు. నాణేలు, కరెన్సీ నోట్లు, హాలీవుడ్‌ నటుల ఫొటోలూ వాటిలో వదిలేయడం గమనార్హం.
  • పోలింగ్‌ కేంద్రాల్లోకి క్రూరమృగాలు వచ్చిన సందర్భాలున్నాయి. పోలింగ్‌కు ముందు రోజు రాత్రి ఆంధ్రప్రదేశ్‌లోని ఓ పోలింగ్‌ కేంద్రంలో పులి ప్రవేశించి కాసేపటికి వెళ్లిపోయింది. మరుసటి రోజు పోలింగ్‌ పూర్తయిన తర్వాత సిబ్బంది తిరుగు ప్రయాణంలో వారి జీపునకు అతి సమీపంలోకి ఆ క్రూర మృగం మళ్లీ వచ్చి ఆగింది. కేవలం 10 అడుగుల దూరంలోనే అడ్డుగా నిలిచింది. కాసేపటి తర్వాత అక్కడి నుంచి వెళ్లిపోవడంతో సిబ్బంది ఊపిరి పీల్చుకున్నారు.
  • మధ్యప్రదేశ్‌లోనూ ఓ పోలింగ్‌ కేంద్రంలోకి వచ్చిన పులి.. అక్కడ నిద్రిస్తున్న ఓ వ్యక్తి కాలు పట్టుకుని లాక్కెళ్లేందుకు ప్రయత్నించింది.
  • కొత్త దిల్లీ పార్లమెంటు స్థానం నుంచి పోటీ చేసేందుకు సిద్ధమైన ఓ వ్యక్తి.. నామినేషన్‌లో తనను తాను దైవంతో పోల్చుకోవడం గమనార్హం. చివరకు రిటర్నింగ్‌ ఆఫీసర్‌ దాన్ని తిరస్కరించారు.
Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని