తెదేపాలోకి 40 మంది వాలంటీర్లు

నెల్లూరు (స్టోన్‌హౌస్‌పేట), న్యూస్‌టుడే: శ్రీపొట్టిశ్రీరాములు నెల్లూరు జిల్లాలో వాలంటీర్లు 40 మంది మూకుమ్మడిగా తమ ఉద్యోగాలకు రాజీనామా చేశారు. పట్టణ తెదేపా ఎంపీ అభ్యర్థి వేమిరెడ్డి ప్రభాకర్‌రెడ్డి క్యాంప్‌ కార్యాలయంలో శుక్రవారం జరిగిన కార్యక్రమంలో వారంతా పార్టీలో చేరారు. వారికి ప్రభాకర్‌రెడ్డి, కోవూరు నియోజకవర్గం తెదేపా అభ్యర్థి ప్రశాంతిరెడ్డి దంపతులు కండువాలు కప్పి పార్టీలోకి ఆహ్వానించారు. విడవలూరు మండల పరిధిలో పనిచేస్తున్న ఈ 40 మంది వాలంటీర్లు స్వచ్ఛందంగా తెదేపాలో చేరారని ప్రశాంతిరెడ్డి తెలిపారు. చంద్రబాబు ముఖ్యమంత్రి అయితే తమకు రూ.10 వేల జీతం వస్తుందని వారు నమ్ముతున్నట్లు వివరించారు. స్థానిక వైకాపా నాయకులు కొందరు మహిళలతో ప్రవర్తిస్తున్న తీరు సక్రమంగా లేదని వాలంటీర్లు చెప్పినట్లు తెలిపారు. చంద్రబాబుతోనే అభివృద్ధి జరుగుతుందని భావించి తెదేపాలో చేరినట్లు కొందరు వాలంటీర్లు పేర్కొన్నారు.