మంత్రి పెద్దిరెడ్డిది అవినీతి సామ్రాజ్యం

పీలేరు సభలో మండిపడ్డ షర్మిల

ఈనాడు, కడప: మంత్రి పెద్దిరెడ్డి రామచంద్రారెడ్డి రాష్ట్ల్రంలో అవినీతి సామ్రాజ్యాన్ని స్థాపించుకున్నారని పీసీసీ అధ్యక్షురాలు షర్మిల ఆరోపించారు. ఎమ్మెల్యేలను రబ్బరు స్టాంపల్లా మార్చేసి పెద్దిరెడ్డి, ఆయన కుమారుడు ఎంపీ మిథున్‌రెడ్డి రాజ్యమేలుతున్నారని విమర్శించారు. పెద్దిరెడ్డి చెప్పినట్లే అన్నీ జరుగుతున్నాయని, రాష్ట్ర ఖజానాను కొల్లకొడుతున్నారని ఆరోపించారు. పీలేరు, మదనపల్లె, తంబళ్లపల్లె నియోజకవర్గాల్లో మంగళవారం జరిగిన ప్రచార సభల్లో ఆమె ప్రసంగించారు.  వైఎస్‌ఆర్‌ హయాంలో హంద్రీ- నీవా ప్రాజెక్టును 90 శాతం పూర్తి చేయగా, జగన్‌ అధికారంలోకి రాగానే కనీసం 10 శాతం కూడా పూర్తి చేయలేకపోయారన్నారు. కాంగ్రెస్‌ అధికారంలోకి రాగానే పదేళ్లు ప్రత్యేక హోదా ఇస్తామని, పేద మహిళకు ఏడాదికి రూ.లక్ష, రూ.5 లక్షలతో పక్కా ఇళ్లు మహిళల పేరిట కట్టిస్తామని హామీ ఇచ్చారు.