తొలిదశకు ముగిసిన ప్రచారం

రేపు 102 లోక్‌సభ స్థానాల్లో పోలింగ్‌
అరుణాచల్‌ అసెంబ్లీకి కూడా

దిల్లీ: సార్వత్రిక సమరం అసలుసిసలు ఘట్టంలోకి ప్రవేశించింది. ఏడు విడతలకు విస్తరించిన ఎన్నికల్లో తొలిదశ కింద 21 రాష్ట్రాలు/ కేంద్రపాలిత ప్రాంతాల్లోని 102 లోక్‌సభ స్థానాలకు శుక్రవారం పోలింగ్‌ జరగనుంది. నిబంధనల ప్రకారం బుధవారం సాయంత్రంతో ఈ నియోజకవర్గాల్లో ప్రచారానికి తెరపడింది. తమిళనాడులోని మొత్తం 39 నియోజకవర్గాలకూ ఈ దశలోనే ఎన్నికలు జరగనున్నాయి. రాజస్థాన్‌లో 12, ఉత్తర్‌ప్రదేశ్‌ 8, మధ్యప్రదేశ్‌ 6; మహారాష్ట్ర, అస్సాం, ఉత్తరాఖండ్‌ రాష్ట్రాల్లో అయిదు చొప్పున; బిహార్‌లో నాలుగు, పశ్చిమ బెంగాల్‌లో మూడు; అరుణాచల్‌ప్రదేశ్‌, మణిపుర్‌, మేఘాలయల్లో రెండు చొప్పున; ఛత్తీస్‌గఢ్‌, మిజోరం, నాగాలాండ్‌, సిక్కిం, త్రిపుర, అండమాన్‌ నికోబార్‌, జమ్మూకశ్మీర్‌, లక్షద్వీప్‌, పుదుచ్చేరిలలో ఒక్కొక్కటి చొప్పున లోక్‌సభ స్థానాలకు ఈ విడతలో పోలింగ్‌ జరగనుంది. చివరిరోజున- కాంగ్రెస్‌ అగ్రనేత ప్రియాంకా గాంధీ, సమాజ్‌వాదీ పార్టీ అధ్యక్షుడు అఖిలేశ్‌యాదవ్‌లు యూపీలో ప్రచారం నిర్వహించారు. ప్రధాని మోదీ అస్సాంతో పాటు త్రిపురలో బహిరంగ సభల్లో పాల్గొన్నారు.

బరిలో 8 మంది కేంద్ర మంత్రులు

ఈ విడతలో 8 మంది కేంద్రమంత్రులు, ఇద్దరు మాజీ ముఖ్యమంత్రులు, ఓ మాజీ గవర్నర్‌ తమ అదృష్టాన్ని పరీక్షించుకోనున్నారు.

• కేంద్ర రోడ్డు రవాణా శాఖ మంత్రి నితిన్‌ గడ్కరీ (భాజపా) మహారాష్ట్రలోని నాగ్‌పుర్‌ నుంచి హ్యాట్రిక్‌ విజయంపై కన్నేశారు. 2014లో 2.84 లక్షలు, 2019లో 2.16 లక్షల ఓట్ల ఆధిక్యంతో గెలుపొందిన ఆయన.. ఈ దఫా ఏకంగా 5 లక్షల మెజార్టీతో ఘన విజయం సాధిస్తానని ధీమాగా చెబుతున్నారు.
•  కేంద్ర భూవిజ్ఞాన శాఖ మంత్రి కిరణ్‌ రిజిజు (భాజపా) అరుణాచల్‌ పశ్చిమ స్థానం బరిలో ఉన్నారు. 2004 నుంచి ఇక్కడ ఆయన మూడుసార్లు గెలుపొందారు. ప్రస్తుతం ఆయన ప్రధాన ప్రత్యర్థి అరుణాచల్‌ ప్రదేశ్‌ మాజీ ముఖ్యమంత్రి నబమ్‌ తుకి (కాంగ్రెస్‌).
• ః కేంద్ర ఓడరేవులు, షిప్పింగ్‌, జలమార్గాల మంత్రి సర్బానంద సోనోవాల్‌ (భాజపా) అస్సాంలోని దిబ్రూగఢ్‌ నుంచి పోటీ చేస్తున్నారు. ఇక్కడ సిట్టింగ్‌ ఎంపీగా ఉన్న మరో కేంద్రమంత్రి రామేశ్వర్‌ తేలీని కాదని సోనోవాల్‌కు కమలదళం టికెట్‌ ఇచ్చింది.
• కేంద్రమంత్రి సంజీవ్‌ బలియాన్‌ (భాజపా) ఉత్తర్‌ప్రదేశ్‌లోని ముజఫర్‌నగర్‌ నుంచి బరిలో నిలిచారు. హరీంద్ర మాలిక్‌ (ఎస్పీ), దారాసింగ్‌ ప్రజాపతి (బీఎస్పీ)ల నుంచి ఆయన గట్టి పోటీ ఎదుర్కొంటున్నారు.
•  రాజస్థాన్‌లోని బీకానేర్‌లో కేంద్ర న్యాయశాఖ మంత్రి అర్జున్‌రామ్‌ మేఘ్‌వాల్‌, అళ్వర్‌లో మరో కేంద్రమంత్రి భూపేంద్ర యాదవ్‌ భాజపా అభ్యర్థులుగా బరిలో ఉన్నారు.
•  కేంద్ర సహాయమంత్రి జితేంద్రసింగ్‌ (భాజపా) జమ్మూకశ్మీర్‌లోని ఉధమ్‌పుర్‌లో హ్యాట్రిక్‌ విజయం కోసం ప్రయత్నిస్తుండగా.. మరో సహాయమంత్రి ఎల్‌.మురుగన్‌ (భాజపా) తమిళనాడులోని నీలగిరిలో డీఎంకే సిట్టింగ్‌ ఎంపీ ఎ.రాజాను ఢీకొంటున్నారు.
•  తెలంగాణ గవర్నర్‌, పుదుచ్చేరి లెఫ్టినెంట్‌ గవర్నర్‌ పదవులకు ఇటీవల రాజీనామా చేసిన తమిళిసై సౌందరరాజన్‌ (భాజపా) తమిళనాడులోని చెన్నై దక్షిణ స్థానంలో పోటీ చేస్తున్నారు.
• ః త్రిపుర పశ్చిమ నియోజకవర్గంలో మాజీ సీఎం బిప్లబ్‌కుమార్‌ దేవ్‌ (భాజపా) బరిలో ఉన్నారు.