వైకాపాకు అనుకూలంగా విజయవాడ సీపీ దర్యాప్తు

సీఈసీకి వర్ల రామయ్య లేఖ

ఈనాడు డిజిటల్‌, అమరావతి: సీఎం జగన్‌పై రాయితో దాడి చేసిన ఘటనలో విజయవాడ పోలీస్‌ కమిషనర్‌(సీపీ) కాంతిరాణా వైకాపాకు అనుకూలంగా దర్యాప్తు నిర్వహిస్తున్నారని తెదేపా పొలిట్‌బ్యూరో సభ్యుడు వర్ల రామయ్య ఆరోపించారు. ఘటనతో సంబంధం లేకపోయినా బొండా ఉమామహేశ్వరరావును ఇరికించాలని చూస్తున్నారని పేర్కొన్నారు. తద్వారా అక్కడ వైకాపా అభ్యర్థికి మేలు చేయాలని చూస్తున్నారన్నారు. బొండా ఉమాపై అక్రమ కేసు బనాయించకుండా సీపీని ఆదేశించాలని కోరుతూ కేంద్ర ప్రధాన ఎన్నికల కమిషనర్‌(సీఈసీ)కు బుధవారం ఆయన లేఖ రాశారు. దీంతో పాటు సీఈఓ ముకేశ్‌కుమార్‌ మీనా, డీజీపీ రాజేంద్రనాథరెడ్డికీ వేర్వేరుగా ఆయన లేఖలు రాశారు.

గులకరాయి దాడిలో బొండా ఉమాపై అక్రమ కేసు బనాయించేందుకు సీఎం జగన్‌ ప్రయత్నిస్తున్నారని మాజీమంత్రి చినరాజప్ప, పాలకొల్లు ఎమ్మెల్యే నిమ్మల రామానాయుడు ఓ ప్రకటనలో మండిపడ్డారు.