అనుచిత వ్యాఖ్యలు చేసిన సీఎం జగన్‌పై చర్యలు తీసుకోవాలి

సీఈఓకు ఫిర్యాదు చేసిన జనసేన నేతలు

ఈనాడు డిజిటల్‌, అమరావతి: జనసేన అధినేత పవన్‌కల్యాణ్‌ను ఉద్దేశించి ఈ నెల 16న భీమవరం సభలో సీఎం జగన్‌ చేసిన అనుచిత వ్యాఖ్యలపై ప్రధాన ఎన్నికల అధికారి ముకేష్‌కుమార్‌ మీనాకు ఆ పార్టీ నాయకులు శుక్రవారం ఫిర్యాదు చేశారు. ‘పవన్‌ పెళ్లిళ్ల గురించి ప్రస్తావించడం ఎన్నికల ప్రవర్తనా నియమావళి ఉల్లంఘన కిందకు వస్తుంది. ఎన్నికల్లో సానుభూతితో గెలిచేందుకు ప్రయత్నిస్తున్నారు. రాష్ట్రంలోని మహిళల్ని కించపరిచే విధంగా మాట్లాడిన జగన్‌పై చర్యలు తీసుకోవాలి’ అని జనసేన రాష్ట్ర ప్రధాన కార్యదర్శి శివశంకర్‌ విజ్ఞప్తి చేశారు.