పోస్టల్‌ బ్యాలెట్‌ ఏర్పాట్లలో అధికారుల నిర్లక్ష్యం

సీఈవోకు వర్ల రామయ్య లేఖ

ఈనాడు డిజిటల్‌, అమరావతి: ఎన్నికల విధుల్లో పాల్గొనే ఉద్యోగులకు ఇచ్చే పోస్టల్‌ బ్యాలెట్‌ ఓట్ల దరఖాస్తుకు అధికారులు తగిన ఏర్పాట్లు చేయడం లేదని తెదేపా పొలిట్‌బ్యూరో సభ్యుడు వర్ల రామయ్య ఆరోపించారు. పోస్టల్‌ బ్యాలెట్‌ దరఖాస్తు కోసం ఇచ్చే ఫాం-12 అందించడంలో అధికారులు నిర్లక్ష్యం వహిస్తున్నారని పేర్కొన్నారు. ఈ మేరకు రాష్ట్ర ప్రధాన ఎన్నికల అధికారి ముకేశ్‌కుమార్‌ మీనాకు శుక్రవారం ఆయన లేఖ రాశారు. ‘‘పోస్టల్‌ బ్యాలెట్ల వినియోగంపై నేటికీ ఎటువంటి అవగాహన కార్యక్రమాలు ఏర్పాటు చేయలేదు. పోస్టల్‌ బ్యాలెట్‌ ఓట్లకు సంబంధించి జిల్లాకో నోడల్‌ అధికారిని నియమించి.. ఫాం-12 దరఖాస్తులు స్వీకరించాలని ఈసీ స్పష్టం చేసింది. కానీ ఆ దిశగా చర్యలు తీసుకోవడం లేదు. ఇప్పటికైనా ఈసీ నిబంధనల్ని అనుసరించి ఫాం-12 దరఖాస్తులు అందించేలా చర్యలు తీసుకోండి. ఎన్నికల విధుల్లో ఉన్న ఉద్యోగులు తప్పనిసరిగా ఓటు హక్కు వినియోగించుకునేలా చూడాలి’’ అని లేఖలో వర్ల రామయ్య కోరారు.