ఆర్జేడీలో చేరిన బిహార్‌లోని ఎన్డీయే ఏకైక ముస్లిం ఎంపీ

పట్నా: బిహార్‌కు చెందిన ఎల్‌జేపీ లోక్‌సభ సభ్యుడు మహబూబ్‌ అలీ కైసర్‌ ఆదివారం ఆర్జేడీలో చేరారు. ఆ రాష్ట్రంలో భాజపా నేతృత్వంలోని ఎన్డీయేకు చెందిన ఏకైక ముస్లిం పార్లమెంటు సభ్యుడు మహబూబ్‌ అలీ కావడం గమనార్హం. లాలూప్రసాద్‌ యాదవ్‌ కుమారుడు తేజస్వీ యాదవ్‌ సమక్షంలో కైసర్‌ ఆర్జేడీలో చేరారు. ‘‘పార్టీ అధ్యక్షుడు లాలూప్రసాద్‌తో భేటీ అనంతరం కైసర్‌ ఆర్జేడీలో చేరారు. ఆయన అనుభవం పార్టీకి ఉపయోగపడుతుంది’’ అని తేజస్వీ పేర్కొన్నారు. మాజీ కేంద్ర మంత్రి పశుపతికుమార్‌ పారస్‌ ఎల్జేపీని చీల్చినప్పుడు కైసర్‌ ఆయన వెంట నడిచారు. దీంతో ప్రస్తుత ఎన్నికల్లో చిరాగ్‌ పాస్వాన్‌ టికెట్‌ ఇవ్వలేదు. ఆయనతో సయోధ్యకు కైసర్‌ విఫలయత్నం చేశారు కూడా.