జూన్‌ తొలివారంలోనే ‘రైతు భరోసా’ ఇవ్వాలి

తడిసిన ధాన్యం అంతా కొనాల్సిందే
భారాస మాజీ ఎంపీ వినోద్‌కుమార్‌

ఈనాడు, హైదరాబాద్‌ : జూన్‌ తొలి వారంలోనే ‘రైతు భరోసా’ డబ్బులివ్వాలని... పంటసాగు కోసం రైతులు వడ్డీ వ్యాపారుల దగ్గరకు వెళ్లకుండా చూడాలని భారాస మాజీ ఎంపీ బోయినపల్లి వినోద్‌కుమార్‌ డిమాండ్‌ చేశారు. అకాలవర్షాలకు ధాన్యం తడిసిపోవడంతో రైతులు ఆందోళన చెందుతున్నారని... ఆ మొత్తం ధాన్యాన్ని ప్రభుత్వం కొనుగోలు చేయాలని ఆయన కోరారు. శనివారం తెలంగాణ భవన్‌లో విలేకరులతో మాట్లాడారు. రేవంత్‌ ప్రభుత్వం ఆరు నెలల పాలనలో సాధించిందేమీ లేదన్నారు. ‘దేశంలోనే తొలిసారి రైతుబంధు పథకాన్ని అమలు చేసిన ఘనత కేసీఆర్‌ది. దున్నేటప్పుడే రైతుకు పెట్టుబడి సాయం వస్తే ఉపశమనంగా ఉంటుంది. జూన్‌ మొదటి వారంలోనే రైతులకు ఎకరాకు రూ.7500 విడుదల చేయాలి’ అని కోరారు. ‘క్వింటాకు రూ.500 బోనస్‌ సన్నవడ్లకే ఇవ్వాలని ప్రభుత్వం అనుకోవడం రైతులను మోసగించడమే. ఎన్నికలకు ముందు సన్న వడ్లకే బోనస్‌ అని రేవంత్‌ చెప్పి ఉంటే.. కాంగ్రెస్‌ అభ్యర్థులకు డిపాజిట్లు వచ్చేవి కాదు’ అని అన్నారు.