పోలీసులు తప్పుడు కేసులు పెడుతున్నారు

తిరుపతిలో ఎన్నికల అనంతర ఘర్షణలపై  బాధితుల ఆందోళన
పోలింగ్‌ రోజు వైకాపా మూకల దాడి
వీడియోల విడుదల

వైకాపా శ్రేణుల దాడి వీడియోను చూపిస్తున్న బాధితుడు మురళీధర్‌

ఈనాడు, తిరుపతి: తిరుపతి జిల్లా చంద్రగిరి మండలం రామిరెడ్డిపల్లె, కూచివారిపల్లెల్లో పోలింగ్‌ ముగిసిన తర్వాత జరిగిన ఘర్షణలో.. అక్కడ లేనివారిపై పోలీసులు తప్పుడు కేసులు పెడుతున్నారని బాధితుడు మురళీధర్‌ వాపోయారు. ఈ ఘటనలకు సంబంధించిన వీడియోలను ఆదివారం ఆయన మీడియాకు విడుదల చేశారు. ‘పోలింగ్‌ రోజు నేను రామిరెడ్డిపల్లెలో తెదేపా ఏజెంట్‌గా కూర్చొన్నా. రాత్రి 7.54కు పోలింగ్‌ పూర్తయింది. 8.44కు పోలింగ్‌ బూత్‌ నుంచి బయటకు రాగానే వైకాపా నేత కొటాల చంద్రశేఖర్‌రెడ్డి, అతని అనుచరులు దాడి చేశారు. అక్కడి నుంచి ఎలాగోలా బయటపడి స్వగ్రామమైన కూచివారిపల్లెకు 9.06 గంటలకు చేరుకున్నా. చంద్రశేఖర్‌రెడ్డి అనుచరులు మరోసారి కూచివారిపల్లెకు వచ్చి రాళ్లు, కర్రలతో కొట్టారు. 12మంది తెదేపా సానుభూతిపరులకు గాయాలయ్యాయి. ఆత్మరక్షణ కోసం గ్రామస్థులు ఎదురుదాడికి దిగడంతో వాళ్లు పారిపోయారు. విషయం తెలుసుకున్న చంద్రగిరి వైకాపా అభ్యర్థి మోహిత్‌రెడ్డి, ఆయన సోదరుడు హర్షిత్‌రెడ్డి.. కర్రలు తీసుకొని 9.12 గంటలకు గ్రామానికి చేరుకున్నారు. అప్పటికే మాకు గాయాలు కావడంతో నారావారిపల్లెలోని ఆసుపత్రికి వెళ్లాం. చంద్రశేఖర్‌రెడ్డి ఇంటికి మేం నిప్పు పెట్టలేదు. పూర్తి ఆధారాలను సిట్‌కు అందిస్తాం. పోలీసులు కావాలని గ్రామానికి చెందిన సాఫ్ట్‌వేర్‌ ఉద్యోగులపైనా తప్పుడు కేసులు నమోదు చేస్తున్నారు’ అని మురళీధర్‌ వివరించారు.