ఏపీలో చంద్రబాబు అధికారం చేపట్టబోతున్నారు

చింతా మోహన్‌ 

ఈనాడు, దిల్లీ: ఎన్నికల ఫలితాల్లో ఆంధ్రప్రదేశ్‌లో కూటమి గెలుపొందుతుందని.. చంద్రబాబు అధికారం చేపట్టబోతున్నారని తిరుపతి మాజీ ఎంపీ, కాంగ్రెస్‌ పార్టీ సీనియర్‌ నేత చింతా మోహన్‌ పేర్కొన్నారు. ఆయన ఆదివారం ఇక్కడి ఏపీ భవన్‌లో విలేకర్లతో మాట్లాడారు. ‘‘ఏపీలో సీఎం జగన్, ప్రధాని మోదీ వ్యతిరేక పవనాలు స్పష్టంగా కనిపించాయి. చంద్రబాబు భాజపాతో పొత్తు పెట్టుకోవడం వల్ల కొన్ని అసెంబ్లీ సీట్లు తగ్గుతాయి. లేదంటే 150కి పైగా వచ్చేవి. దేశవ్యాప్తంగా భాజపాకు 150కి మించి ఎంపీ స్థానాలు రావు. ఈ ఎన్నికల్లో ప్రాంతీయ పార్టీ వైకాపా రూ.4-5 వేల కోట్ల వరకు ఖర్చు చేసింది. అంత డబ్బును జగన్‌ ఎలా తేగలిగారు? అందుకు ఆయనకు పద్మశ్రీ, పద్మభూషణ్‌ పురస్కారాలిచ్చినా తక్కువే. ఎన్ని అక్రమాలకు పాల్పడినా.. ప్రజలు ఆ పార్టీకి తగిన బుద్ధి చెప్పారు’’ అని వివరించారు.