దేశం మార్పు తుపాను చూస్తోంది: రాహుల్‌

దిల్లీ, రాయ్‌బరేలీ: రాజ్యాంగాన్ని, ప్రజాస్వామ్యాన్ని పరిరక్షించేందుకు ప్రజలు అండగా నిలిచారన్న సంగతి విస్పష్టమని, దేశం మార్పు తుపానును చూస్తోందని కాంగ్రెస్‌ అగ్రనేత రాహుల్‌ గాంధీ పేర్కొన్నారు. సార్వత్రిక ఎన్నికల ఐదో దశలో భాగంగా సోమవారం 49 నియోజకవర్గాల్లో పోలింగ్‌ నేపథ్యంలో ఆయన ఈ వ్యాఖ్యలు చేశారు. ‘‘తొలి నాలుగు దశల పోలింగ్‌ సరళిని పరిశీలించాక.. రాజ్యాంగాన్ని, ప్రజాస్వామ్యాన్ని రక్షించేందుకు, భాజపాను ఓడించేందుకు ప్రజలు అండగా నిలిచారన్నది స్పష్టమవుతోంది’’ అని ఎక్స్‌లో ఓ పోస్టు పెట్టారు. ‘‘విద్వేష రాజకీయాలతో దేశం విసిగిపోయింది. ఇప్పుడు సొంత సమస్యల పరిష్కారానికి ఓటింగ్‌ జరుగుతోంది. యువత ఉద్యోగాల కోసం, రైతులు కనీస మద్దతు ధర, రుణ విముక్తి కోసం, మహిళలు ఆర్థిక స్వాతంత్య్రం, భద్రత కోసం, కార్మికులు సముచితమైన వేతనాల కోసం ఓటు వేస్తున్నారు’’ అని వెల్లడించారు. తాను పోటీచేస్తున్న రాయ్‌బరేలీలోని హనుమాన్‌ ఆలయంలో రాహుల్‌ సోమవారం ప్రత్యేక పూజలు చేశారు. అనంతరం నియోజకవర్గంలోని వివిధ పోలింగ్‌ కేంద్రాలను పరిశీలించారు.