వ్యవస్థలన్నీ నిష్ఫలం : ప్రియాంక

గొడ్డా/ రాంచీ: మళ్లీ అధికారంలోకి వస్తే రాజ్యాంగాన్ని ఎట్టిపరిస్థితుల్లోనూ మార్చాలనే కృతనిశ్చయంతో భాజపా ఉందని, గత పదేళ్లలో పార్లమెంటు, న్యాయవ్యవస్థ సహా వ్యవస్థల్ని అది నిష్ఫలం చేసిందని ఏఐసీసీ ప్రధాన కార్యదర్శి ప్రియాంకాగాంధీ ఆరోపించారు. కేంద్ర విధానాలను ఎవరు వ్యతిరేకిస్తే వారిని వేధిస్తున్నారని చెప్పారు. ఝార్ఖండ్‌లోని గొడ్డా, రాంచీలలో బుధవారం ఎన్నికల ప్రచార సభల్లో ఆమె ప్రసంగించారు. దేశంలో అన్ని ప్రధాన వ్యవస్థల్ని కాంగ్రెస్సే తీసుకువచ్చిందని చెప్పారు. ‘‘కొవిడ్‌ టీకాలు తయారు చేసే ఒక సంస్థ నుంచి ప్రధాని రూ.52 కోట్లు విరాళం తీసుకున్నారు. ఆ వ్యాక్సిన్‌ ఇప్పుడు ప్రజల శరీరాలపై దుష్ప్రభావం చూపిస్తోంది. పారిశ్రామికవేత్తల రుణాలను ప్రభుత్వం రద్దుచేయడంతోపాటు ప్రజల ఆస్తుల్ని విక్రయించేసింది. దానివల్ల 70 కోట్లమంది యువత నిరుద్యోగులుగా మారారు. చంద్రయాన్‌-3 ఖ్యాతిని పొందడం మరచిపోని మోదీ.. ఆ ప్రయోగం వెనుక ఉన్న హెచ్‌ఈసీ వంటి సంస్థల సిబ్బందికి జీతాలు రాకపోయినా పట్టించుకోరు’’ అని విమర్శించారు.