ఐదో విడతలో మహిళా ఓటర్లదే పైచేయి

దిల్లీ: ప్రస్తుత సార్వత్రిక సమరం ఐదో విడతలో 62.2% పోలింగ్‌ నమోదైందని ఎన్నికల సంఘం (ఈసీ) గురువారం వెల్లడించింది. ఈ దశలో పురుషులతో పోలిస్తే మహిళలు ఎక్కువగా ఓటుహక్కును వినియోగించుకున్నారని తెలిపింది. ఈసీ గణాంకాల ప్రకారం- ఐదో విడతలోని మొత్తం నమోదిత మహిళా ఓటర్లలో 63% మంది ఓటు వేశారు. పురుషుల్లో అది కేవలం 61.48%గా ఉంది. ఒడిశాలో కంధమాల్‌ లోక్‌సభ స్థానం పరిధిలోని రెండు పోలింగ్‌ కేంద్రాల్లో రీపోలింగ్‌ పూర్తయ్యాక పోలింగ్‌ శాతం స్వల్పంగా మారే అవకాశాలు ఉన్నాయి. బిహార్, ఝార్ఖండ్‌లలో స్త్రీ, పురుష ఓటర్ల మధ్య అంతరం ఎక్కువగా కనిపించింది. బిహార్‌లో 61.58% మహిళా ఓటర్లు తమ ఓటుహక్కును వినియోగించుకోగా, పురుష ఓటర్లలో అది కేవలం 52.42%గా నమోదైంది. ఝార్ఖండ్‌ ఓటర్లలో 68.65% స్త్రీలు, 58.08% పురుషులు ఓటు వేశారు. ఐదో విడతలో భాగంగా ఆరు రాష్ట్రాలు, రెండు కేంద్రపాలిత ప్రాంతాల్లోని 49 లోక్‌సభ స్థానాలకు ఈ నెల 20న పోలింగ్‌ జరిగిన సంగతి తెలిసిందే.