‘మండలి’ పోలింగు రోజు వారికి సెలవు: ఈసీ

ఈనాడు, హైదరాబాద్‌: రాష్ట్ర శాసనమండలిలో వరంగల్‌-ఖమ్మం-నల్గొండ పట్టభద్రుల నియోజకవర్గ ఉప ఎన్నిక పోలింగు రోజును కేంద్ర, రాష్ట్ర ప్రభుత్వ సంస్థల్లో పని చేసే వారిలో ఓటు ఉన్న ఉద్యోగులకు ప్రత్యేక సెలవు (స్పెషల్‌ క్యాజువల్‌ లీవ్‌)గా కేంద్ర ఎన్నికల సంఘం ప్రకటించింది. ఉప ఎన్నిక ఈ నెల 27వ తేదీన జరగనుండగా.. ఆ రోజు ప్రయివేటు సంస్థల్లో పని చేసే ఓటు ఉన్న వారికి విధుల సమయాల్లో వెసులుబాటు ఇవ్వాలని తెలంగాణ రాష్ట్ర ముఖ్య ఎన్నికల అధికారి వికాస్‌రాజ్‌ శుక్రవారం ఉత్తర్వులు జారీ చేశారు. కేంద్ర, రాష్ట్ర ప్రభుత్వ కార్యాలయాల్లో పని చేస్తున్న ఓటర్లకు మాత్రమే ప్రత్యేక సెలవు వర్తిస్తుందని పేర్కొన్నారు. ఉదయం ఏడు గంటల నుంచి సాయంత్రం నాలుగు గంటల వరకు పోలింగు జరుగుతుంది. పట్టభద్రుల నియోజకవర్గ పరిధిలోని వరంగల్, హనుమకొండ, మహబూబాబాద్, జయశంకర్‌ భూపాలపల్లి, జనగామ, ములుగు, సిద్దిపేట, ఖమ్మం, భద్రాద్రి-కొత్తగూడెం, నల్గొండ, సూర్యాపేట, యాదాద్రి-భువనగిరి జిల్లాల్లోని 4,61,806 మంది ఓటర్లు నమోదు అయ్యారు. నెగోషియబుల్‌ ఇన్‌స్ట్రుమెంట్‌ యాక్ట్‌ ప్రకారం మండలి ఎన్నికల పోలింగు రోజున ప్రయివేటు సంస్థలకు సెలవు ఇచ్చే అవకాశం లేకపోవటంతో డ్యూటీ షిఫ్టుల్లో మార్పులు చేయాలని పేర్కొన్నారు.