గతంలో సీఎస్‌లెవరూ ఇలా వ్యవహరించలేదు

సోమిరెడ్డి చంద్రమోహన్‌రెడ్డి ధ్వజం 

ఈనాడు డిజిటల్, అమరావతి: జవహర్‌రెడ్డిలా ఏ ప్రభుత్వ ప్రధాన కార్యదర్శీ వ్యవహరించలేదని మాజీమంత్రి సోమిరెడ్డి చంద్రమోహన్‌రెడ్డి ధ్వజమెత్తారు. ఆయన హయాంలో రాష్ట్రంలో అన్ని వ్యవస్థలూ కుప్పకూలిపోయాయని ఎక్స్‌ వేదికగా ఆదివారం దుయ్యబట్టారు. బాధ్యతాయుతమైన రాష్ట్ర ఉన్నతాధికారిపై ఆరోపణలు చేశారని, పరువునష్టం దావా వేస్తానంటున్నారే.. మీ బాధ్యతలు మీరు సక్రమంగా నిర్వర్తించారా? అని నిలదీశారు. ‘శాసనసభలో ప్రజాప్రతినిధులు ఆమోదించిన బడ్జెట్‌ కేటాయింపులకు విలువ లేకుండా చేశారు. వ్యవసాయం, నీటిపారుదల, ఆర్‌అండ్‌బీ, విద్య తదితర శాఖలకు కేటాయించిన నిధుల్ని మళ్లించే అధికారం మీకెవరిచ్చారు?’ అని సోమిరెడ్డి ప్రశ్నించారు. ఎన్డీయే ప్రభుత్వం రాగానే ఆయన భూ కుంభకోణం తేలుస్తామని హెచ్చరించారు. ‘రాష్ట్రవ్యాప్తంగా రెవెన్యూ శాఖను భూకుంభకోణాలకు అడ్డాగా మార్చారు. ల్యాండ్‌ టైటిలింగ్‌ చట్టాన్ని ఎలా అనుమతించారు? రీసర్వేను బలవంతంగా ఎలా రుద్దుతారు? రాష్ట్రంలో రాజకీయ హింస జరుగుతుంటే అదుపు చేయడంలో విఫలమైన ఆయనకు కన్ఫర్డ్‌ ఐఏఎస్‌ల ఫైలుపై అంత ఆత్రమెందుకో’ అని సోమిరెడ్డి మండిపడ్డారు.