ఎన్నికల్లో వ్యతిరేకంగా పని చేశారని దళిత కుటుంబంపై వైకాపా వర్గీయుల దాడి

అనంతపురం ప్రభుత్వ ఆసుపత్రిలో వైద్యం  పొందుతున్న నాగమణి

ధర్మవరం, న్యూస్‌టుడే: శ్రీసత్యసాయి జిల్లా ధర్మవరంలోని కేతిరెడ్డి కాలనీలో మంగళవారం రాత్రి దళిత కుటుంబంపై ఎమ్మెల్యే, వైకాపా అభ్యర్థి కేతిరెడ్డి వెంకటరామిరెడ్డి అనుచరులు దాడి చేశారు. ఎన్నికల్లో భాజపా అభ్యర్థి సత్యకుమార్‌కు మద్దతుగా పనిచేస్తారా? అంటూ నాగమణి, ఆమె కుమారులు రామాంజనేయులు, నగేశ్‌పై వైకాపా వర్గీయులు కర్రలతో మూకుమ్మడిగా దాడి చేశారు. దాడిలో వైకాపా నాయకుడు సరితాల బాషా, అశోక్, సురేశ్, నరేశ్, పృథ్వీ పాల్గొన్నారని బాధితురాలు నాగమణి ధర్మవరం రెండో పట్టణ పోలీసులకు బుధవారం ఫిర్యాదు చేశారు. గాయపడిన నాగమణి, ఆమె కుమారులు రామాంజనేయులు, నగేశ్‌ అనంతపురం ప్రభుత్వాసుపత్రిలో చికిత్స పొందుతున్నారు. వైకాపాకు వ్యతిరేకంగా పని చేశారని బెదిరించడంతోపాటు తనను కులం పేరుతో బాషా, ఆయన అనుచరులు దూషించి దాడి చేశారని నాగమణి ఫిర్యాదులో పేర్కొన్నారు. వైకాపావారిపై ధర్మవరం రెండో పట్టణ పోలీసులు కేసు నమోదు చేశారు.