శంషాబాద్‌ విమానాశ్రయంలో చంద్రబాబుకు ఘనస్వాగతం

విదేశీ పర్యటనను ముగించుకొని బుధవారం ఉదయం హైదరాబాద్‌ చేరుకున్న అనంతరం విమానాశ్రయంలో నాయకులు, కార్యకర్తలకు అభివాదం చేస్తున్న చంద్రబాబు

హైదరాబాద్, న్యూస్‌టుడే: తెలుగుదేశం పార్టీ అధ్యక్షుడు నారా చంద్రబాబునాయుడు, భువనేశ్వరి దంపతులు విదేశీ పర్యటనను ముగించుకొని బుధవారం ఉదయం హైదరాబాద్‌ చేరుకున్నారు. తెదేపా నాయకులు, కార్యకర్తలు శంషాబాద్‌ విమానాశ్రయానికి భారీగా తరలివచ్చారు. చంద్రబాబు విమానాశ్రయం నుంచి బయటకు రాగానే వారంతా సీఎం.. సీఎం అంటూ పెద్దపెట్టున నినాదాలు చేశారు. బొకేలతో ఆయనకు స్వాగతం పలకడానికి ఎగబడ్డారు. వారిని అదుపు చేయడానికి భద్రతా సిబ్బంది తీవ్రంగా శ్రమించాల్సి వచ్చింది.