విజయసాయికి ప్రత్యక్ష రాజకీయాల దెబ్బ

నెల్లూరులో పోటీ.. పలకరించిన ఓటమి  

నెల్లూరులోని లెక్కింపు కేంద్రంలోంచి ఓటమి బాధతో వస్తున్న విజయసాయిరెడ్డి 

ఈనాడు, అమరావతి: వైకాపా పార్లమెంటరీ నేత విజయసాయిరెడ్డికి ప్రత్యక్ష రాజకీయాల్లో తొలి ప్రయత్నంలోనే ఎదురుదెబ్బ తగిలింది. నెల్లూరు లోక్‌సభ స్థానంలో తెదేపా అభ్యర్థి వేమిరెడ్డి ప్రభాకరరెడ్డి చేతిలో ఆయన ఓటమి పాలయ్యారు. జగన్‌ అక్రమాస్తుల కేసులో ఏ-2గా, సీఎంకు అత్యంత సన్నిహితుడిగా సాయిరెడ్డి దిల్లీలో ఆయనకు రాజకీయ లాబీయింగ్‌ చేస్తూ వచ్చారు. నెల్లూరు లోక్‌సభ నియోజకవర్గ అభ్యర్థి అనుకున్న వేమిరెడ్డి ప్రభాకర్‌రెడ్డి పార్టీని వీడి తెదేపాలో చేరడంతో...ఆ సీటును తమ బంధువులకు ఇప్పించుకునేందుకు సాయిరెడ్డి ప్రయత్నించారు. ‘వాళ్లెందుకు నువ్వే పోటీ చేయన్నా’ అని జగన్‌ బలవంతం చేస్తే విధిలేని పరిస్థితుల్లో నెల్లూరు లోక్‌సభ స్థానం నుంచి వైకాపా అభ్యర్థిగా బరిలో దిగారు. ఈ జిల్లా వైకాపాకు కంచుకోట అని.. స్వీప్‌ చేస్తామని ధీమానూ వ్యక్తం చేశారు. కానీ ఫలితం తిరగబడింది. 

సుబ్బారెడ్డి సేఫ్‌

జగన్‌ బాబాయ్‌ వైవీ సుబ్బారెడ్డి ఈ ఎన్నికల్లో ఒంగోలు లోక్‌సభ స్థానం నుంచి పోటీ చేయాలని గట్టిగా ప్రయత్నించారు. సర్దుబాటు కాకపోవడంతో టికెట్‌ ఇవ్వట్లేదంటూ జగన్‌ ఆయన్ను రాజ్యసభకు పంపారు. సుబ్బారెడ్డి పోటీ చేయకపోవడమే మంచిదయిందని, ఈ పరాభావం నుంచి తప్పించుకోగలిగారని వైకాపా నేతలు వ్యాఖ్యానిస్తున్నారు.