లోక్‌సభ ఫలితాల్లో రాజకీయ కుటుంబాల హవా

దిల్లీ: లోక్‌సభ ఎన్నికల్లో రాజకీయ కుటుంబాలు మంచి ఫలితాలను సాధించాయి. ఎక్కువమంది తాము పోటీ చేసిన స్థానాల్లో విజయం సాధించారు. ఉత్తర్‌ప్రదేశ్‌లో ఎస్పీ వ్యవస్థాపకుడు, దివంగత నేత ములాయంసింగ్‌ యాదవ్‌ కుటుంబం నుంచి ఆయన కుమారుడు అఖిలేశ్‌ యాదవ్‌తో సహా అయిదుగురు పోటీ చేయగా అందరూ ఘన విజయం సాధించారు. బిహార్‌లో ఆర్జేడీ అధినేత లాలూప్రసాద్‌ కుమార్తెలు ఇద్దరూ పోటీ చేయగా మీసా భారతి గెలుపొందారు. కర్ణాటకలో మాజీ ప్రధాని దేవెగౌడ కుమారుడు, జేడీఎస్‌ అభ్యర్థి కుమారస్వామి,  దేవేగౌడ అల్లుడు, భాజపా అభ్యర్థి మంజునాథ్‌ ఇద్దరూ భారీ ఆధిక్యంతో విజయం సాధించారు. లైంగిక ఆరోపణలు ఎదుర్కొన్న దేవెగౌడ మనవడు ప్రజ్వల్‌ రేవణ్ణ పరాజయం చెందారు.