జగన్‌ విధ్వంసకర పాలనకు గుణపాఠం

గన్నవరం గ్రామీణం, న్యూస్‌టుడే: జగన్‌ విధ్వంసకర పాలనకు ఏపీ ప్రజలు తగిన గుణపాఠం చెప్పారని హిందూపురం హ్యాట్రిక్‌ విజేత నందమూరి బాలకృష్ణ పేర్కొన్నారు. ఫలితాల తర్వాత బాలకృష్ణ మంగళవారం సాయంత్రం బెంగళూరు నుంచి విజయవాడ విమానాశ్రయానికి రాగా.. అతని సన్నిహితుడు బొర్రా గాంధీ నేతృత్వంలోని తెదేపా శ్రేణులు ఘనస్వాగతం పలికాయి. అనంతరం బాలకృష్ణ రోడ్డు మార్గంలో విజయవాడ వెళ్లారు. ఎయిర్‌ పోర్టులో మాట్లాడుతూ.. ‘జగన్‌ అసలు నైజాన్ని గమనించి ఈసారి జనం ఓడించారు. ప్రతిపక్ష హోదా ఇవ్వలేదు. పవన్‌కల్యాణ్‌ మాతో చేతులు కలిపి మంచి మెజార్టీకి కారణమయ్యారు. చంద్రబాబు విజన్‌ ప్రపంచానికే ఓ బ్రాండ్‌. రేపటి నుంచి ఆయన రాష్ట్రాభివృద్ధికి పని చేస్తుంటార’ని అన్నారు.