త్వరలోనే భాజపాకు వైకాపా సరెండర్‌

దిల్లీ మద్యం కుంభకోణంలో భారతి ప్రమేయం
భాజపా నేత ఆదినారాయణరెడ్డి ఆరోపణ 

ఈనాడు, అమరావతి: దిల్లీ మద్యం కుంభకోణంలో జగన్‌ సతీమణి భారతికి కూడా హస్తం ఉందని జమ్మలమడుగు నుంచి భాజపా ఎమ్మెల్యేగా ఎన్నికైన ఆదినారాయణరెడ్డి ఆరోపించారు. ఆ విషయంపై విచారణ జరిపిస్తామని పేర్కొన్నారు. ఆ పార్టీ రాష్ట్ర కార్యాలయంలో గురువారం ఆయన మాట్లాడుతూ.. కొత్తగా ఎన్నికైన వైకాపా ఎమ్మెల్యేలు వారం రోజుల్లోనే జంప్‌ అయ్యేందుకు సిద్ధంగా ఉన్నారని వ్యాఖ్యానించారు. పులివెందులలోనూ వైకాపా నామరూపాలు లేకుండా పోతుందని, జగన్‌ అతి త్వరలోనే వైకాపాను భాజపాకు సరెండర్‌ చేస్తారని అన్నారు. మాజీ మంత్రి వివేకానందరెడ్డి హత్య విషయంలో.. కొత్తగా ఎంపీగా ఎన్నికైన అవినాష్‌రెడ్డిపై తప్పకుండా చర్యలు ఉంటాయని చెప్పారు. 

• విశాఖ నార్త్, ఆదోని అసెంబ్లీ స్థానాల నుంచి గెలిచిన విష్ణుకుమార్‌రాజు, పార్థసారథిలు రాష్ట్ర పార్టీ కార్యాలయంలో సీనియర్‌ నేతలను గురువారం మర్యాదపూర్వకంగా కలుసుకున్నారు.