ఇక్కడ కనిపిస్తున్నది పవన్‌ కాదు.. తుపాన్‌

ఎన్డీయేకు ఏపీ ప్రజలు చరిత్రాత్మక విజయం చేకూర్చారు: ప్రధాని మోదీ

ఈనాడు, దిల్లీ: అభివృద్ధిని ఆకాంక్షిస్తూ ఆంధ్రప్రదేశ్‌ ప్రజలు ఎన్డీయేకి చరిత్రాత్మక విజయం చేకూర్చినట్లు ప్రధానమంత్రి నరేంద్ర మోదీ పేర్కొన్నారు. ఎన్డీయే నేతగా తనను ఎన్నుకున్నందున కృతజ్ఞతలు తెలుపుతూ చేసిన ప్రసంగంలో ఆయన ఈ వ్యాఖ్య చేశారు. ‘‘ఎన్డీయేకి ప్రజలు చరిత్రాత్మక విజయం చేకూర్చిన విషయం చంద్రబాబు కూడా చెప్పారు. ఇక్కడ కనిపిస్తున్నది పవన్‌ కాదు.. తుపాన్‌. ఆంధ్రప్రదేశ్‌ ప్రజలు మాకు భారీ విజయం చేకూర్చారు’’ అని మోదీ అన్నారు. అలాగే తెలంగాణ, కర్ణాటకల్లోని కాంగ్రెస్‌ ప్రభుత్వాలపై వ్యంగ్యాస్త్రాలు సంధించారు. ‘‘దక్షిణ భారతదేశంలో ఎన్డీయే కొత్త పునాదిరాయి వేసింది. కర్ణాటక, తెలంగాణల్లో ఇటీవలే అధికారంలోకి వచ్చిన కాంగ్రెస్‌ ప్రభుత్వాలు అనతికాలంలోనే అక్కడ ప్రజావిశ్వాసాన్ని కోల్పోయాయి. భ్రమల్లోంచి ప్రజలు బయటికొచ్చి ఎన్డీయేని అక్కున చేర్చుకున్నారు’’ అని పేర్కొన్నారు.

ఎన్డీయే నాయకుడిగా మోదీ ఏకగ్రీవంగా ఎన్నికవడంతో రాష్ట్ర భాజాపా కార్యాలయం వద్ద సంబరాలు చేసుకుంటున్న పార్టీ శ్రేణులు