వైకాపా కవ్వింపు చర్యలపై సంయమనం పాటించండి

తెదేపా శ్రేణులకు చంద్రబాబు పిలుపు

ఈనాడు డిజిటల్, అమరావతి: ఎన్నికల్లో ఘోర పరాభవాన్ని తట్టుకోలేక వైకాపా వాళ్లు చేస్తున్న కవ్వింపు చర్యలపై అప్రమత్తంగా ఉండాలని తెదేపా శ్రేణులకు ఆ పార్టీ అధినేత, కాబోయే ముఖ్యమంత్రి చంద్రబాబు పిలుపునిచ్చారు. ఈ విషయంలో శ్రద్ధగా ఉండాలని, దాడులు, ప్రతిదాడులు జరగకుండా చూడాలని ఎన్నికైన ఎమ్మెల్యేలు, నేతల్ని ఆదేశించారు. రాష్ట్రవ్యాప్తంగా వివిధ ప్రాంతాల్లో తెదేపా, వైకాపా శ్రేణుల మధ్య నెలకొన్న ఉద్రిక్త, ఘర్షణ ఘటనలపై ఆరా తీశారు. పార్టీ నేతల నుంచి ఆయా ఘటనలకు సంబంధించిన సమాచారం తెప్పించుకున్నారు. వైకాపా కార్యకర్తలు రెచ్చగొట్టే చర్యలకు పాల్పడినా సంయమనం పాటించాలన్నారు. శాంతిభద్రతల్ని కాపాడాలని, ఉద్రిక్త పరిస్థితుల్ని నిలువరించాలని పోలీసులకు సూచించారు.