Ponguleti Srinivas Reddy: ఐటీ దాడులు.. కుట్రపూరితం: పొంగులేటి

ఖమ్మం: మాజీ ఎంపీ, పాలేరు కాంగ్రెస్‌ అభ్యర్థి పొంగులేటి శ్రీనివాస్‌రెడ్డి నివాసంలో ఐటీ సోదాలు ముగిశాయి. ఖమ్మంలోని ఆయన నివాసంలో సోదాలు పూర్తి అయిన అనంతరం విచారణ నిమిత్తం హైదరాబాద్‌ రావాలని ఆయన కుటుంబసభ్యులకు ఐటీ అధికారులు సూచించారు. ఐటీ అధికారుల సూచనతో పొంగులేటి సతీమణి, కుమారుడు, సోదరుడు హైదరాబాద్‌ బయలుదేరారు. ఈ సందర్భంగా పొంగులేటి మాట్లాడుతూ.. ‘కొండను తవ్వి ఎలుకను పట్టిన చందంగా ఐటీ దాడులున్నాయి. వందల మంది ఐటీ అధికారులు ఏకకాలంలో సోదాలు చేశారు. 30కిపైగా ప్రాంతాల్లో సోదాలు చేసినా ఏమీ దొరకలేదు. కేంద్ర, రాష్ట్ర ప్రభుత్వాలు కుట్రపూరితంగా ఐటీ దాడులకు పురిగొల్పాయి’’ అని పొంగులేటి శ్రీనివాస్‌రెడ్డి ఆరోపించారు.