మీ పార్టీ కార్యాలయానికి వస్తా

 మా పార్టీ నేతలనూ తీసుకొస్తా 
మాలో ఎవరినైనా అరెస్టు చేసుకోవచ్చు
ప్రధానమంత్రికి కేజ్రీవాల్‌ సవాల్‌

దిల్లీ: భాజపా ప్రధాన కార్యాలయానికి ఆదివారం తాను తమ పార్టీ నేతలతో కలిసి వెళ్తానని దిల్లీ సీఎం కేజ్రీవాల్‌ శనివారం ప్రకటించారు. ఆ సందర్భంగా ఎవరిని కోరుకుంటే వారిని ప్రధానమంత్రి జైలుకు పంపించుకోవచ్చని పేర్కొన్నారు. ఆప్‌ ఎంపీ రాఘవ్‌ చడ్డా, దిల్లీ మంత్రులు ఆతిశీ, సౌరభ్‌ భరద్వాజ్‌లను జైలుకు పంపడం ఖాయమని భాజపా పేర్కొంటున్న నేపథ్యంలో కేజ్రీవాల్‌ స్పందించారు.  మనీశ్‌ సిసోదియా, సత్యేంద్ర జైన్, సంజయ్‌ సింగ్‌లను పంపినట్లుగా ఆప్‌ నేతలను జైలుకు పంపడమనే ఆటను ప్రధాని ఆడుతున్నారని ఆరోపించారు. ‘‘ఆదివారం మా పార్టీ ఎమ్మెల్యేలు ఎంపీలంతా కలిసి భాజపా కార్యాలయానికి వెళ్తాం. ప్రధాని  మాలో ఎవరిని జైలుకు పంపాలనుకుంటున్నారో వారిని పంపించుకోవచ్చు. ఆప్‌ అనేది ఓ సిద్ధాంతం. ఎంతమంది నేతలను మీరు జైలుకు పంపితే..దేశం అంతకు వంద రెట్లు నేతలను తయారు చేస్తుంది’’ అని కేజ్రీవాల్‌ పేర్కొన్నారు.