Gujarat Polls: ముగిసిన ప్రచారం.. తొలిపోరుకు గుజరాత్‌ సిద్ధం

అహ్మదాబాద్‌: గుజరాత్‌ అసెంబ్లీ తొలిదశ ఎన్నికల ప్రచారానికి తెరపడింది. ముమ్మర ప్రచారంతో దూసుకెళ్లిన ప్రధాన రాజకీయ పార్టీలు.. తొలిదశ ప్రచారానికి ముగింపు చెప్పాయి. భాజపా తరఫున పార్టీ జాతీయాధ్యక్షుడు జేపీ నడ్డా, కేంద్ర మంత్రి స్మృతి ఇరానీలు భావ్‌నగర్‌, కచ్‌ జిల్లాలోని గాంధీధామ్‌లలో నేడు ప్రచారం నిర్వహించారు. మొదటి దశలో భాగంగా 89 అసెంబ్లీ స్థానాలకు డిసెంబర్‌ 1న పోలింగ్‌ జరగనుంది. మరో 93 స్థానాలకు డిసెంబర్‌ 5న పోలింగ్‌ జరగనుండగా.. 8న ఓట్ల లెక్కింపు ఉంటుంది.

తొలిదశలో ఆమ్‌ఆద్మీ పార్టీ ముఖ్యమంత్రి అభ్యర్థి ఇసుదాన్‌ గఢ్వీ బరిలో ఉన్నారు. ద్వారకా జిల్లాలోని ఖాంభాలియా అసెంబ్లీ స్థానం నుంచి ఆయన పోటీ చేస్తున్నారు. గుజరాత్‌ మాజీ మంత్రి పురుషోత్తం సోలంకీ, ఆరుసార్లు ఎమ్మెల్యే అయిన కున్వార్‌జీ బవాలియా, మోర్బీ హీరో కాంతీలాల్‌ అమృతీయ, క్రికెటర్‌ రవీంద్ర జడేజా సతీమణి రివాబా, ఆమ్‌ఆద్మీ పార్టీ గుజరాత్‌ అధ్యక్షుడు గోపాల్‌ ఇటాలియా వంటి ముఖ్య వ్యక్తులు తొలిదశ పోటీలో ఉన్నారు.

భాజపా తరఫున ప్రధానమంత్రి నరేంద్ర మోదీ, హోంమంత్రి అమిత్‌ షా, పార్టీ అధ్యక్షుడు జేపీ నడ్డాతోపాటు పలువురు భాజపా సీనియర్‌ నేతలు ప్రచారాన్ని నిర్వహించారు. ఆమ్‌ఆద్మీ పార్టీ జాతీయ కన్వీనర్‌, దిల్లీ ముఖ్యమంత్రి అరవింద్‌ కేజ్రీవాల్‌ ముమ్మర ప్రచారాన్ని చేసుకుంటూ.. పలు ఉచిత హామీలను గుప్పించారు. ఇక కాంగ్రెస్‌ తరఫున పార్టీ అధ్యక్షుడు మల్లికార్జున ఖర్గే, రాజస్థాన్‌ సీఎం అశోక్‌ గహ్లోత్‌ వంటి సీనియర్‌ నేతలు ప్రచారం చేశారు.