Lok Sabha Election Results: సినీ ప్రముఖుల గెలుపోటములు ఇలా..

ఇంటర్నెట్‌ డెస్క్‌: ఈ లోక్‌సభ ఎన్నికల్లో సినీరంగానికి చెందిన పలువురు తారలు తమ అదృష్టాన్ని పరీక్షించుకున్నారు. వెండితెర, బుల్లితెరపై మెరిసి ప్రేక్షకులకు చేరువైన నటీనటులు పలు పార్టీల నుంచి పోటీ చేశారు. మరి వారి గెలుపోటములు ఎలా ఉన్నాయి. ఈసారి లోక్‌సభకు అడుగుపెట్టే తారలు ఎవరంటే..?

• హిమాచల్‌ప్రదేశ్‌లోని మండీ నుంచి తొలిసారి ఎన్నికల్లో పోటీ చేసిన బాలీవుడ్‌ హీరోయిన్‌ కంగనా రనౌత్‌ (భాజపా తరఫున) అరంగేట్రంలోనే విజయం సాధించారు.  కాంగ్రెస్‌ అభ్యర్థి, రాష్ట్ర మంత్రి విక్రమాదిత్య సింగ్‌పై 74వేల ఓట్ల మెజార్టీతో గెలిచారు.
• టీవీ రాముడిగా పేరొందిన అరుణ్‌ గోవిల్‌ (భాజపా) ఉత్తర్‌ప్రదేశ్‌ మేరఠ్‌లో తన సమీప ఎస్పీ అభ్యర్థి సునీతా వర్మపై 10,585 ఓట్ల ఓట్ల ఆధిక్యంతో గెలుపొందారు.
• ‘డ్రీమ్‌ గర్ల్‌’ హేమామాలిని యూపీలోని మథుర నుంచి వరుసగా మూడోసారి విజయం సాధించారు. కాంగ్రెస్‌ అభ్యర్థి ముకేశ్‌ ధంగర్‌పై 2.93 లక్షల మెజార్టీ సాధించారు.

• టీవీ నటిగా, మోడల్‌గా గుర్తింపు పొంది రాజకీయాల్లోకి వచ్చిన స్మృతి ఇరానీకి ఈసారి గట్టి షాక్‌ తగిలింది. యూపీలోని అమేఠీ నుంచి ఆమె తన ప్రత్యర్థి కిశోరీ లాల్‌ శర్మ (కాంగ్రెస్‌) చేతిలో 1.62లక్షల ఓట్ల తేడాతో ఓటమి చవిచూశారు.
• ‘రేసు గుర్రం’ సినిమాతో తెలుగు ప్రేక్షకుల్లో మంచి గుర్తింపు పొందిన రవికిషన్‌ గోరఖ్‌పుర్‌ (యూపీ)లో తన సమీప ప్రత్యర్థి భోజ్‌పురి నటి కాజల్‌ నిషాద్‌ (ఎస్పీ)పై లక్ష ఓట్లతో గెలిచారు.
• తెలుగులో పలు సినిమాల్లో అలరించిన నటి నవనీత్‌ రాణా వరుసగా రెండోసారి అమరావతి (మహారాష్ట్ర) నుంచి తలపడ్డారు. అయితే.. కాంగ్రెస్‌ అభ్యర్థి బల్వంత్‌ బసవంత్‌ వాంఖడే చేతిలో 19 వేల ఓట్ల తేడాతో పరాజయం పాలయ్యారు.
• పశ్చిమ బెంగాల్‌లోని హుగ్లీ నుంచి సినీ నటి, సిట్టింగ్‌ ఎంపీ లాకెట్‌ ఛటర్జీ (భాజపా) మరోసారి ఇదే స్థానం నుంచి బరిలో దిగారు. ఆమెకు పోటీగా టీఎంసీ మరో ప్రముఖ నటి రచనా బెనర్జీని నిలబెట్టింది. ఈ క్రమంలోనే రచన 76 వేట ఓట్ల ఆధిక్యంతో జయకేతనం ఎగురవేశారు.

• బెంగాల్‌లోని ఘటల్‌ నుంచి తృణమూల్‌ సిట్టింగ్‌ ఎంపీ అయిన సినీ నటుడు దీపక్‌ అధికారి అలియాస్‌ దేవ్‌ తన సమీప భాజపా అభ్యర్థి, సినీ నటుడు హిరణ్మయ్‌ ఛటోపాధ్యాయపై 1.82 లక్షల ఓట్ల తేడాతో గెలిచారు.
• సీనియర్‌ సినీ నటుడు, అసన్‌సోల్‌ సిట్టింగ్‌ ఎంపీ శతృఘ్న సిన్హా (టీఎంసీ) వరుసగా రెండోసారి విజయం సాధించారు. భాజపా అభ్యర్థి ఎస్‌ఎస్‌ అహ్లూవాలియాపై దాదాపు 60వేల ఓట్ల మెజార్టీతో గెలుపొందారు.
• నార్త్‌ ఈస్ట్‌ దిల్లీ నుంచి భోజ్‌పురి నటుడు మనోజ్‌ తివారీ భాజపా అభ్యర్థిగా వరుసగా మూడోసారి పోటీ చేశారు. తాజా ఫలితాల్లో ఆయన కాంగ్రెస్‌ అభ్యర్థి కన్హయ్య కుమార్‌పై 1,38,778 లక్షల ఓట్ల మెజార్టీతో విజయం సాధించారు. 
• కేరళలోని త్రిసూర్‌ నుంచి రాజ్యసభ సభ్యుడు, సీనియర్‌ మలయాళ నటుడు సురేశ్‌ గోపి (భాజపా) 74వేల ఓట్ల మెజార్టీతో విజయం సాధించారు.
• కేరళలోని కొల్లంలో సినీ నటుడు కృష్ణ కుమార్‌ భాజపా నుంచి, మరో సినీ నటుడు ఎం.ముఖేశ్‌ సీపీఎం నుంచి పోటీ చేయగా.. వీరిని గెలుపు వరించలేదు.
• తమిళనాడులోని కన్యాకుమారి నుంచి కాంగ్రెస్‌ సిట్టింగ్‌ ఎంపీ, తమిళ నటుడు విజయ్‌ వసంత్‌ తన సమీప భాజపా అభ్యర్థి పొన్‌ రాధాకృష్ణన్‌పై 1,79,097 లక్షల ఓట్ల మెజార్టీతో గెలుపొందారు. 
• తమిళనాడులోని కడలూర్‌ నుంచి భాజపా మిత్రపక్షం పీఎంకే తరఫున సినీ నటుడు, దర్శకుడు, సినిమాటోగ్రాఫర్‌ తంగర్‌ బచన్‌ పోటీ చేయగా మూడో స్థానంతో సరిపెట్టుకోవాల్సి వచ్చింది.
• కర్ణాటకలోని శివమొగ్గ నుంచి కన్నడ సూపర్‌స్టార్‌ శివరాజ్‌ కుమార్‌ సతీమణి గీతా శివరాజ్‌ కుమార్‌.. మాజీ ముఖ్యమంత్రి యడియూరప్ప కుమారుడు బీవై రాఘవేంద్ర చేతిలో ఓటమిపాలయ్యారు.
• పశ్చిమ బెంగాల్‌లోని బహరంపుర్‌ నుంచి అధిర్‌ రంజన్‌ చౌధరీ (కాంగ్రెస్‌)పై మాజీ క్రికెటర్‌ యూసఫ్‌ పఠాన్‌ (టీఎంసీ) 85, 022 ఓట్ల మెజార్టీతో విజయం సాధించారు.