కక్షపూరితంగానే ‘మమత’ విద్యార్థులపై ఈసీకి తుమ్మల ఫిర్యాదు: మంత్రి పువ్వాడ

ఖమ్మం: దొంగ ఓట్ల నమోదుపై ఖమ్మం కాంగ్రెస్ అభ్యర్థి తుమ్మల నాగేశ్వరరావు కేంద్ర ఎన్నికల సంఘానికి (ఈసీ) లేఖ రాయడంపై మంత్రి, భారాస అభ్యర్థి పువ్వాడ అజయ్‌ కుమార్‌ స్పందించారు. కక్షపూరితంగానే మమత వైద్య కళాశాల విద్యార్థుల ఓట్లపై తుమ్మల ఈసీకి ఫిర్యాదు చేశారని ఆరోపించారు. ‘‘తుమ్మలకు ఓటు వేస్తే మంచి ఓటు.. లేకపోతే దొంగ ఓటా? తుమ్మలకు ఓటువేసేవారికే ఓటు ఉండాలా? 18 ఏళ్లు నిండిన ప్రతి ఒక్కరూ ఓటు వేయొచ్చు. మమత వైద్య కళాశాల విద్యార్థులు ఓట్లు నమోదు చేసుకుంటే తప్పా?’’ అని మంత్రి పువ్వాడ ప్రశ్నించారు. 

ఖమ్మం జిల్లాలో ఇంటి నంబర్లు లేకుండా ఓట్లు నమోదు చేశారని సోమవారం తుమ్మల ఆరోపించారు. దొంగ ఓట్లు నమోదు చేశారంటూ ఫిర్యాదుతో కూడిన లేఖను ఈసీకి పంపారు. ఈ అంశంపై జిల్లా కలెక్టర్‌, సీఈవో ఇతర ఎన్నికల అధికారులకు ఫిర్యాదు చేసినా పట్టించుకోలేదన్నారు. ఇంటి నంబర్లు లేకుండా నమోదు చేసిన ఓట్లను వెంటనే తొలగించి.. బాధ్యులైన అధికారులపై చర్యలు తీసుకోవాలని ఈసీని తుమ్మల కోరిన విషయం తెలిసిందే.