Pinnelli: అర్థరాత్రి పల్నాడు ఎస్పీ కార్యాలయానికి వెళ్లిన ఎమ్మెల్యే పిన్నెల్లి

అమరావతి: మాచర్ల ఎమ్మెల్యే, వైకాపా నేత పిన్నెల్లి రామకృష్ణారెడ్డి మంగళవారం అర్ధరాత్రి పల్నాడు ఎస్పీ కార్యాలయానికి వెళ్లారు. రోజూ ఎస్పీ కార్యాలయానికి వెళ్లి సంతకం చేయాలన్న హైకోర్టు ఆదేశాల మేరకు ఆయన అక్కడికి వెళ్లారు. పిన్నెల్లి రామకృష్ణారెడ్డి దాఖలు చేసిన ముందస్తు బెయిల్‌ పిటిషన్లపై మంగళవారం హైకోర్టు మధ్యంతర ఉత్తర్వులు జారీ చేసింది. ఈవీఎం ధ్వంసం కేసులో జూన్‌ 6 వరకు పిన్నెల్లిని అరెస్ట్‌ చేయొద్దంటూ ఇప్పటికే స్పష్టం చేసిన ధర్మాసనం, మాచర్ల హింసలో పోలీసులు నమోదు చేసిన ఇతర కేసుల్లోనూ ఆ తేదీ వరకూ ఎలాంటి చర్యలు తీసుకోవద్దని ఆదేశించింది. తదుపరి విచారణను జూన్‌ 6కు వాయిదా వేసింది.