Kalvakuntla Kavitha: రేపు విచారణకు హాజరుకాలేను: సీబీఐకి ఎమ్మెల్సీ కవిత లేఖ

హైదరాబాద్: దిల్లీ మద్యం కేసులో దర్యాప్తునకు సంబంధించి మంగళవారం విచారణకు హాజరు కాలేనని సీబీఐ(CBI)కి తెరాస(TRS) ఎమ్మెల్సీ కల్వకుంట్ల కవిత (Kalvakuntla kavitha) తెలిపారు. ఈ మేరకు సీబీఐ అధికారులకు ఆమె లేఖ రాశారు. ముందుగా ఖరారైన కార్యక్రమాల కారణంగా హాజరుకాలేనని లేఖలో కవిత పేర్కొన్నారు. ఈనెల 11, 12, 14, 15 తేదీలలో అందుబాటులో ఉంటానని తెలిపారు.

మద్యం కేసులో కేంద్రహోంశాఖ ఇచ్చిన ఫిర్యాదు, ఎఫ్‌ఐఆర్‌ ప్రతులు ఇవ్వాలని ఇటీవల సీబీఐని కవిత కోరారు. దీంతో సీబీఐ అధికారులు.. వెబ్‌సైట్‌లో ఎఫ్‌ఐఆర్‌ కాపీ ఉందని ఈమెయిల్‌ ద్వారా ఆమెకు తెలిపారు. దీనిపై స్పందించిన కవిత.. మళ్లీ సీబీఐకు లేఖ రాశారు. ‘‘సీబీఐ వెబ్‌సైట్‌లో ఎఫ్‌ఐఆర్‌ కాపీని క్షుణ్ణంగా పరిశీలించా.. అందులో నా పేరు లేదు. అయినా విచారణకు సహకరించేందుకు సిద్ధంగా ఉన్నా. ముందుగా ఖరారైన కార్యక్రమాల దృష్ట్యా మంగళవారం (6వ తేదీ) విచారణకు హాజరుకాలేను. ఈ నెల 11, 12, 14, 15 తేదీలలో అందుబాటులో ఉంటాను’’ అని ఆమె లేఖలో పేర్కొన్నారు.