Harish Rao: త్వరలో సిద్దిపేట నుంచి తిరుపతి, బెంగళూరుకు రైలు: హరీశ్‌రావు

సిద్దిపేట: త్వరలో సిద్దిపేట నుంచి తిరుపతి, బెంగళూరుకు రైలు సేవలు అందుబాటులోకి రానున్నాయని మంత్రి హరీశ్‌ రావు వెల్లడించారు. సిద్దిపేటలో వీఎస్‌ఎస్‌ కన్వెన్షన్‌ను మంత్రి ప్రారంభించారు. ఈసారి లక్షన్నర ఓట్ల మెజార్టీతో హరీశ్‌ రావును గెలిపించాలని ఈ సందర్భంగా ఆర్యవైశ్యులు తీర్మానం చేశారు. మంత్రి హరీశ్‌ రావు మాట్లాడుతూ.. కేదార్‌నాథ్‌, బద్రీనాథ్‌లో అన్నం పెట్టిన ఘనత సిద్దిపేట వైశ్యులదన్నారు. మంగళవారం నుంచి సిద్దిపేటకు రైలు సేవలు ప్రారంభమవుతాయని తెలిపారు. ఈ నెల 5న సిద్దిపేటలో వెయ్యి పడకల ఆసుపత్రిని ప్రారంభించనున్నట్లు వెల్లడించారు. త్వరలోనే సిద్దిపేటలో వృద్ధాశ్రమం ఏర్పాటు చేస్తామని మంత్రి హామీ ఇచ్చారు.

రైలు వస్తున్న తరుణం..

3న 3 గంటలకు

మెదక్‌ జిల్లా మనోహరాబాద్‌ - కరీంనగర్‌ జిల్లా కొత్తపల్లి మార్గంలో కీలక ఘట్టం మంగళవారం ఆవిష్కృతం కానుంది. సిద్దిపేట నుంచి సికింద్రాబాద్‌ వరకు పుష్‌పుల్‌ రైలు (డీజిల్‌ ఎలక్ట్రికల్‌ మల్టీపుల్‌ యూనిట్‌) సేవలు అందుబాటులోకి రానున్నాయి. ఈ నెల 3న మధ్యాహ్నం 3 గంటల తరువాత ప్రధాని మోదీ నిజామాబాద్‌ నుంచి వర్చువల్‌ విధానంలో ప్రారంభించనున్నట్లు అధికారవర్గాలు ప్రకటించాయి. ఈ మార్గంలో రెండు రైళ్లు రాకపోకలు సాగించేందుకు రైల్వే శాఖ తాజాగా పచ్చజెండా ఊపింది.