Varla ramaiah: ప్రతి శుక్రవారం కోర్టుకు.. రోజూ సీబీఐ విచారణకు ఇక నుంచైనా జగన్‌ హాజరుకావాలి

తెదేపా పొలిట్‌బ్యూరో సభ్యుడు  వర్ల రామయ్య డిమాండ్‌ 

ఈనాడు డిజిటల్, అమరావతి: ఇక నుంచైనా జగన్‌రెడ్డి ప్రతి శుక్రవారం కోర్టుకు.. రోజూ సీబీఐ విచారణకు హాజరుకావాలని తెదేపా పొలిట్‌బ్యూరో సభ్యుడు వర్ల రామయ్య డిమాండ్‌ చేశారు. ఏళ్లుగా పెండింగ్‌లో ఉన్న సీబీఐ, ఈడీ కేసులను ఓ కొలిక్కి తీసుకురావడానికి సహకరించాలన్నారు. జగన్‌ అరాచకాలతోనే ఎన్నికల్లో వైకాపా ఓడిపోయిందని విమర్శించారు. 

పరాజయంపై ఆత్మవిమర్శ చేసుకోవాల్సింది పోయి ఆ నెపాన్ని ఇతరులపై నెట్టడం సిగ్గుచేటని ఆగ్రహం వ్యక్తం చేశారు. మంగళగిరిలోని తెదేపా కేంద్ర కార్యాలయంలో శుక్రవారం ఆయన విలేకరులతో మాట్లాడారు. ‘వైకాపా పాలనలో దళితులపై దాడులు పెరిగాయి. బటన్లు నొక్కినంత మాత్రాన వారు చేసిన నేరాలను ప్రజలు మర్చిపోరు. మాచర్లలో వైకాపా వాళ్లకు భయపడి 250 ఎస్సీ కుటుంబాలు ఊళ్లు విడిచి వెళ్లిపోయాయి. రాజధాని కోసం భూములిచ్చిన రైతులకు బేడీలు వేసి వీధుల్లో తిప్పారు. ఈ పాపాల ఫలితంగానే 29 ఎస్సీ నియోజకవర్గాల్లో వైకాపా 2 మాత్రమే గెలిచింది’ అని వర్ల రామయ్య పేర్కొన్నారు.