Raghav Chadha: ఆప్‌ కీలక నేత రాఘవ్‌ చద్దా ఎక్కడా..?

ఇంటర్నెట్‌డెస్క్‌: దిల్లీ ముఖ్యమంత్రి అరవింద్‌ కేజ్రీవాల్‌ అరెస్టు వంటి పరిణామాలు చోటు చేసుకొన్న సమయంలో ఆ పార్టీ ముఖ్యనేతల్లో ఒకరైన రాఘవ్‌ చద్దా (Raghav Chadha) కనిపించలేదు. ఈ విషయాన్ని ఎన్‌సీపీ శరద్‌ పవార్‌ వర్గానికి చెందిన ప్రతిపక్ష ఉపనేత జితేంద్ర అవ్హద్‌ ఎక్స్‌ వేదికగా ప్రశ్నించారు. ఈ రెండు పార్టీలు ఇండియా కూటమిలో సభ్యులు కావడం గమనార్హం. 

‘రాఘవ్‌ చద్దా ఎక్కడ..?’ అని శనివారం ఎక్స్‌ వేదికగా జితేంద్ర అవ్హద్‌ అడిగారు. ఆ తర్వాత సదరు పోస్టును తొలగించారు. ఆయన ఈ పోస్టు చేయడానికి ముందు ఆప్‌ నేత ఆతిశీ చురుగ్గా పార్టీ వ్యవహారాల్లో కనిపించడంపై మాట్లాడారు. అదే సమయంలో రాఘవ్‌ ఆ పార్టీకి విలువైన నాయకుడని పేర్కొన్నారు. ‘‘ఆప్‌లోని అందరు నేతలు తెరపైకి వస్తున్నారు. ఆ పార్టీకి ముఖ చిత్రం వంటి రాఘవ్‌ చద్దా మాత్రం కనిపించడంలేదు. ఆయన గైర్హాజరీ పార్టీ కార్యకర్తలను బాధిస్తోంది. రోజుల తరబడి కనిపించకపోవడం ప్రజలతో దూరాన్ని పెంచుతుంది. అతడు లండన్‌లో ఉన్నాడు. అందుకే మాట్లాడలేకపోయి ఉండొచ్చు. వీడియో సందేశం విడుదల చేస్తే బాగుండేది. ఆయన గైర్హాజరీపై మేము ప్రశ్నలు అడుగుతూనే ఉంటాం’’ అని ఓ ఆంగ్ల వార్తాపత్రిక వద్ద వ్యాఖ్యానించారు. 

రాఘవ్‌ చద్దా దిల్లీ ముఖ్యమంత్రి అరవింద్‌ కేజ్రీవాల్‌కు అత్యంత సన్నిహితుడు. మార్చి తొలి వారంలో నేత్ర వైద్యం నిమిత్తం లండన్‌ వెళ్లారు. నాటి నుంచి అక్కడే ఉండిపోయారు. ఎప్పుడు భారత్‌కు వస్తారో స్పష్టత లేదు. లిక్కర్‌ పాలసీ కేసులో మనీలాండరింగ్‌ ఆరోపణలపై దిల్లీ ముఖ్యమంత్రి అరవింద్‌ కేజ్రీవాల్‌ను ఎన్‌ఫోర్స్‌మెంట్‌ డైరెక్టరేట్‌ అరెస్టు చేసిన విషయం తెలిసిందే.